राम राम सभ्य मिपाकर स्त्रीपुरुषहो, आपण सर्वच जण येथे नेहमी येत असता, लिहीत असता, वाचत असता. मिपावर येणे झाले नाही तर चुकल्याचुकल्या सारखे वाटते, मिपा आता कुटुंबाप्रमाणेच आहे, इत्यादी.. असेही आपल्यापैकी बरेच जण अनेकदा म्हणताना आढळतात.. आता कुटुंबाचाच विषय निघाला तेव्हा अर्थातच प्रत्येकाच्या जोडीदाराचा विषयही ओघानेच आला. आणि म्हणूनच हा पेश्शल धागा मिपाकर सदस्यांच्या जोडीदारांकरता आहे. त्यांची ओळख करून घेण्याकरताच आम्ही ह धागा सुरू करत आहोत.. मिपावरील पुरुष सभासदांच्या जोडीदारांना इथे मिपाच्या सुना मानले आहे आणि स्त्री सभासदांच्या जोडीदाराला येथे मिपाचे जावई मानले आहे. तर मंडळी, प्रत्येकाने आपापल्या जोडीदाराची, म्हणजेच पर्यायाने मिपाच्या जावईसुनांची ओळख येथे करून द्यायची आहे! :) ओळखीचे स्वरूप - विवाह पिरेमातून झाला की घरच्यांनी पाहून? :) जोडीदाराच्या आवडीनिवडी, एकमेकातले वादविवाद-भांडणं मारामार्‍या, एका पार्टनरच्या सतत मिपावर पडिक असल्यामुळे काही भांडणं होतात का? :) इत्यादी इत्यादी इत्यादी... जोडीदाराचा फोटूही येथे टाकल्यास उत्तमच, परंतु आग्रह अर्थातच नाही.. जे पतीपत्नी दोघेही इथले सभासद आहेत त्यांनीही एकमेकांची ओळख करून द्यायची आहे. अर्थात, ते शिक्रेट ठेवायचे असेल तर आग्रह नक्कीच नाही! :) आमच्यासारख्या अविवाहितांना आणि ब्रह्मचार्‍यांना या धाग्यात स्थान नाही! :) चला तर मंडळी, होऊ द्यात सर्वांना मिपाच्या गुणी जावई-सुनांची ओळख..! :) आपला, (अविवाहीत परंतु कुटुंबवत्सल!) तात्या.