मागच्या रविवारी अस्मादिकांची डॉक्टर असोसिएशनच्या (नॅशनल इंटिग्रेटेड मेडिकल असो.) सचिवपदी निवड झाली. सभेत स्वागत, सत्कार वैग्रे सोपस्कारातही रंगराव कंपोस्टवाला की पारखी नजर होती ती आपल्या कामाच्या कचर्‍याकडे. कार्यक्रम पार पडल्यानंतर पसार्‍यातली ढीगभर पुष्पगुच्छ घरी सोबत आणली. एक एक बुके वेगवेगळे करायला जवळपास तीन तासाचा वेळ गेला. काय काय निघालं, यादी तर पहा - १. हुच्च फुले जरबेरा, कार्नेशन वेगळी काढुन घरभर फ्लावर पॉट सजवले. २. सजावटीचा हिरवा पाला आणि फुले- बारीक कातरुन कंपोस्ट करीता गच्चीवर रवाना ३. बुकेला लपेटलेला पारदर्शक प्लास्टिक पेपर - सुटे करुन गादीखाली. उपयोग कस‍ा करायचा अजुन ठरले नाही ४. बुकेच्या मुठीला गुंडाळलेले चकचकीत प्लास्टिक पेपर- सुटे करुन रिकाम्या बिसलरी बॉटलस् मध्ये भरायला ५. सेलो टेपचे तुकडे - एकत्र करुन क्रमांक ४ प्रमाणे ६. दोरा - लपेटुन ठेवलाय. दिवाळीत तो फुग्याला दोरा गुंडाळुन करायचा आकाशकंदील बनवायचाय. DIY की काय असतं न‍ा ते. ७. बुकेच्या रिबन्स - क्रमांक ३ प्रमाणे ८. फुलांचे जाड देठ- बारीक देठ कातरुन कंपोस्ट मध्ये टाकलेय तर जाडसर एकत्र बांधुन ठेवलेत. नविन कुंडी भरताना तळाशी टाकेन ९. हिरवा स्पंज - गरजेनुसार सेल्फ वॉटरींग करीता कुंड्यामध्ये ठेवायला. समजा, भीड/लाज/दुर्लक्ष/ मैनु की अश्या कोणत्याही कारणाने हे बुके मी आणले नसते तर काय झालं असतं पहा - रात्री उशीरा हॉल आवरणार्‍या वेटरने उचलुन रस्त्याच्या कडेला सगळे बुके टाकुन दिले असते. सकाळी भटक्या जनावरानी खायला सुरुवात केली असती. त्यातलं निम्म प्लास्टिक त्यांच्या पोटात गेलं असतं. उरलेलं दुपारी घंटागाडीतुन डंपिंग यार्डला गेलं असतं. ओला कचरा म्हणुन मशीन मेड कंपोस्ट युनिट कडे जावुन प्लास्टीक, दोरा, सेलोटेप युक्त दर्जेदार कंपोस्ट तयार होवुन ऑर्गॅनिक शेतीद्वारे पुन्हा आपल्याच पोटात. शेतकरी बांधव अवगतच असतिल की वेस्ट कंपोस्ट हे त्याच्या निकृष्ट दर्जामुळे सर्वात स्वस्त मिळतं. किंवा - इथे नाशकात हॉटेल वेस्ट एकत्र करुन वीज निर्मिती केली जाते तिकडे पोहोचले जाते. Segrigation at Source न झाल्याने, अत्यंत गरजेपोटी सडलेला, जीवघेणा दुर्गंध येणारा कचरा हाताने विलग करण्याचे काम करणार्‍या तुमच्या माझ्या सारख्याच भगिनींना खरकट्या अन्नाला चिवडुन विलग करावे लागले असते. (या कचर्‍यापासुन वीजनिर्मिती प्रकल्पाचाही किस्सा आहे, पण तो पुन्हा कधीतरी. .) टीप - कचरा विलगीकरण हा अत्यंत महत्वाचा टप्पा बहुदा दुर्लक्षिलाच जातो. . उगमस्थळी विलगीकरण हे सुटसुटीत असतं. तुमच्याकडे या करता द्यावा लागणारा वेळ नसेल तर नक्कीच तुमची आर्थिक स्थिती इतकी सक्षम असेल की कोणाला तरी या कामाकरीता खाशी नेमणुक करु शकाल. टीप टीप - पहिल्या ओळीकडेही लक्ष द्या. .