शितलनी मला आवडलेल्या दूरदर्शन संचावरील जाहिराती हा धागा सुरु केला. त्याचबरोबर अशाही काही जाहिराती असतात ज्या अगदी डोक्यात जातात. समोरचा प्रेक्षक मुर्ख आहे, त्याला काही समजत नाही हे गृहीत धरून केलेल्या जाहिराती. मी मला आठवणार्‍या अशा जाहिराती सांगतो; तुम्ही पण तुमच्या डोक्यात जाणार्‍या जाहिराती सांगा. १) हार्पिकः अक्षरशः पिवळं पडलेले टॉयलेट दाखवून (एवढं पिवळं होऊस्तोवर कोण ठेवेल तसच) डोकं फिरवतात. नेमकी ती जाहिरात जेव्हा जेवायला बसलेलो असतो तेव्हाच लागते २) विसा पॉवर: शंकर-एहेसान-लॉयनी केलेली अतिशय टुकार जाहिरात. ३) बीएसएनएलः प्रीती झिंटाला पहायला मुलाकडचे आलेले असतात. सगळं विचारुन झाल्यावर मुलीकडचे मुलाकडच्यांना फोन नंबर मागतात. तेव्हा मुलाचे वडील मोबाईल नंबर सांगायला सांगतात. तेव्हा प्रिती म्हणते की ते तुम्हाला लॅंडलाईन नंबर मागतायत. आमच्याकडे लॅंडलाईन नाही असं म्हटल्यावर ती उचकते आणि मुलाकडच्यांना ठणकावून सांगते "जिस घर मे बीएसएनएल लॅंडलाईन नही उस घर में मै शादी नही करुंगी".. ४) एमडीएचः ह्या जाहिरातीत त्या कंपनीचा अध्यक्ष चालत येताना दाखवला आहे. म्हातारा, मिशा वाढवलेला असा. त्यांना कोणी दुसरा बरा मॉडेल नाही का मिळाला? त्याच्याकडे पाहून कोण हे मसाले विकत घेणार आहे?