डोंबिवली कट्टा वृत्तांत..

काही दिवसांपूर्वी डोंबिवलीत कट्टा करायचा असं मुक्त विहारींनी ठरवलं, आणि कट्टा होणार की नाही इथपासून तुम्ही डोंबिवलीकरांनी राजकारण केलंत पर्यंतच्या ब-याच चर्चा मिपावर घडून आल्या. पण काहीही झालं तरी कट्टा करायचाच असा ठाम निर्धारच मु.वि. नी केलेला असल्यामुळे अखेरीस ठरलेल्या दिवशी, रविवार २६ मे, रोजी, नंदी पॅलेस मध्ये कट्टयाचा बेत ठरला. कट्ट्याची उपस्थिती किती हा मुद्दा गौण असल्याने जितके आले ते कट्टेकरी. आलो तर येईन पासून रात्री उशीर होईल पण नक्की येईन असं सांगून टांग देणारे वगळले, तरी ४ जण नक्की येणार हे कळलं. मुलूंडच्या डॉ. सुबोध खरेंना खास निमंत्रण होतं, आणि त्यांनीही येण्याचं मान्य केल्यामुळे चौघांमध्ये सुद्धा कट्टा रंगणार याची खात्री झाली. ठरलेल्या वेळी मु.वि. हाटेलात जाऊन मोक्याची जागा पकडून बसले. (हो, त्याच दिवशी आयपीएल चा अंतिम सामना असल्यामुळे हाटेल वाल्यांनी मोठ्या पडद्यावर सामना दाखवण्याची सोय केली होती) पाठोपाठ डॉ. खरे सुद्धा आले. मी आणि निम मात्र डोंबिवलीच्या संडे स्पेशल ट्रॅफ़िकमध्ये अडकलो, आणि जवळपास दीड तास उशिरा, ९.१५ ला पोहोचलो. नंदी पॅलेस डोंबिवलीतल्या रहदारी आणि कोलाहलाच्या बाहेर, एमआयडीसी मध्ये हायवे वर असणारं एक जब्राट हॉटेल आहे. त्याच्या मागच्या बाजूला असलेल्या गार्डन रेस्टॉरंटमध्ये आमचा कंपू जमला होता. संध्याकाळचा सुखद गारवा, हॉटेलमध्ये चालू असलेल्या लाईव्ह गझला, आयपीएल सामना आणि आमची गप्पाष्टकं, सुंदर मिलाफ़ जमला होता. ओळखपाळख झाल्यानंतर, आधी मु.वि. चे आखाती देशांबद्दलचे अनुभव, तिथल्या नोकरीच्या संधी, यांवर चर्चा झाली. त्यानंतर डॉ. खरेंचं मेडिकल आणि नौदलाचं अनुभवकथन सुरू झालं, आणि बाकी सगळे विषय मागे पडले. हे विश्व आम्हां तिघांना अगदीच अपरिचित, त्यामुळे विक्रांतवरचे दिवस, आलेले बरे वाईट अनुभव, हे खुद्द त्यांच्याच तोंडून ऐकण्यातली मजा निराळीच होती. सोबत उदरभरणासाठी वशाट कोंबडं आणि इतर पदार्थ होतेच. गप्पांमध्ये दोन अडीच तास कसे गेले कळलंच नाही. त्यातच मुंबई पहिल्यांदाच आयपीएल जिंकण्याचा वाटेवर होती, त्यामुळे स्टेडियम सारखाच गदारोळ आणि उत्साह इकडेही दिसत होता. पेटपूजा, गप्पा, आणि चेन्नईचे फ़लंदाज धारातिर्थी पडल्यावर टाळ्या शिट्ट्य़ा अशा धमाल वातावरणात चौघांचाच, पण आठवणीत राहील असा कट्टा रात्री १२ च्या सुमारास आटोपला, आणि पुन्हा एकदा भेटण्याचं आश्वासन देऊन सगळे आपापल्या घराकडे मार्गस्थ झाले. उपस्थित कट्टेकरी (डावीकडून) - प्रथम फ़डणीस, मुक्त विहारी, सुबोध खरे आणि निम.