थोडी पार्श्वभूमी - माझी आई ड्रॉईंग काढायची त्यावेळी पेन्सिली, रंग, कागद घेऊन मी काहीतरी लुडबुड करीत बसलेला असे. त्यातूनच पुढे कधीतरी चित्रांबद्दल गोडी निर्माण झाली असावी. मला रंगीत चित्रांपेक्षा रेखाटने अधिक भावतात (कदाचित मला तेवढीच बरी जमत असावीत ;) ). काही वर्षे रेखाटने केली. पुढे कॉलेजच्या दिवसांनंतर आपसूकच तो छंद मागे पडला. आपल्या कितीतरी गोष्टी अशा व्यापातून मागे पडत गेलेल्या मला जाणवते. कामातून सवड काढून, उसंत मिळवून असे छंद पुन्हा एकदा जोपासायला हवेत अशी प्रबळ इच्छा मनात मूळ धरुन आहे. असो. इनोबा आणि केशवसुमार ह्यांनी त्यांची सुंदर रेखाटने इथे टाकली ती बघून बिचकतच मी माझेही एक चित्र टाकायचे ठरवले. १९८५ साली काढलेल्या ह्या चित्राचे, एच्.बी.पेन्सिली आणि ड्रॉईंग पेपर हे माध्यम आहे. (माझ्या सुरुवाती-सुरुवातीच्या चित्रात खोडरबर हेही एक प्रभावी माध्यम असायचे असे मला अंधुकसे आठवते! ;)) चतुरंग