Skip to main content

पुन्हा एकदा...

लेखक हृषीकेश पतकी यांनी रविवार, 23/08/2009 00:41 या दिवशी प्रकाशित केले.

मन्मनीच्या चांदण्याला
एकदा प्राशून जा |
जागले हृदयांतरी जे
तू कधी फुलवून जा ||

स्वप्न आणि सत्य दोन्ही
का सारखे माझ्याचसाठी |
संदर्भ वेड्या भावनांचे
तू एकदा लावून जा ||

मी बोलावता येणे तुझे
मज नित्यनेमाचेच आहे |
भेटण्या मजला सखे
माझ्याविना येऊन जा ||

भाव या डोळ्यातला
अश्रूंसवे झरतोच आहे |
नच साध्य जे ते वर्ज्य हे
माझ्या मना शिकवून जा ||

घेऊ नको तू सोबतीला
या अक्षरांची माळ ही |
उमलेल जे श्वासातूनी
शब्दांविना सजवून जा ||

अंतरीचे गीत माझ्या
मी कधीचे गात आहे |
साथ दे भोळ्या सुरांची
अन तया जुळ्वून जा ||

बहरेन मी आता नव्याने
मज छंद फुलण्याचाच आहे |
सध्या रित्या ह्या ओंजळीची
पाकळी मिटवून जा ||

मैफिलीला रंग माझ्या
तरीही पुन्हा चढणार आहे |
फक्त या जिंदादिलाची
शायरी जमवून जा ||

काव्यरस
शृंगार
लेखनविषय:
वाचने 2619
प्रतिक्रिया 11

प्रतिक्रिया

प्राजु रविवार, 23/08/2009 07:45

सु... रे....ख!!!!
खूपच सुंदर!!!
प्रत्येक कडवं आवडलं... श्वासातूनी सजवण्याची कल्पना खूप छान आहे.
- (सर्वव्यापी)प्राजु
https://praaju.blogspot.com/

क्रान्ति रविवार, 23/08/2009 13:35

बहरेन मी आता नव्याने
मज छंद फुलण्याचाच आहे |
सध्या रित्या ह्या ओंजळीची
पाकळी मिटवून जा ||

सुरेख, सुरेल प्रेमगीत!

क्रान्ति
दिव्यत्वाची जेथ प्रचीती | तेथे कर माझे जुळती
अग्निसखा
रूह की शायरी

विशाल कुलकर्णी मंगळवार, 25/08/2009 10:50

वाह क्या बात है !

बहरेन मी आता नव्याने
मज छंद फुलण्याचाच आहे |
सध्या रित्या ह्या ओंजळीची
पाकळी मिटवून जा || >>

सुरेख, आवडली ! :-)

सस्नेह
विशाल
*************************************************************

आम्ही इथेही पडीक असतो "ऐसी अक्षरे मेळविन!"

सागर बुधवार, 26/08/2009 12:47

काय सुरेख शब्द पुष्पे गुंफली आहेत ऋषिकेशराव ...
अप्रतिम... असेच लिहित रहा...
अगदी सुरेश भटांची आठवण झाली...

माझ्या आवडत्या या चार ओळी
भाव या डोळ्यातला
अश्रूंसवे झरतोच आहे |
नच साध्य जे ते वर्ज्य हे
माझ्या मना शिकवून जा ||

बहुत बढीया...

(कविता, गजल प्रेमी) सागर