मॉल संस्कृती व ऑनलाईन शॉपिंगच्या झगमगाटापुढे टिकण्यासाठी बऱ्याच दुकानांना कात टाकावी लागली. ज्यांना नाही जमलं ती तशीच दिवाळीच्या गजबजाटात जुनं अस्तित्व टिकवण्याचा क्षीण प्रयत्न करत असतात , त्यांना समर्पित... काजळलेल्या भिंती,त्यांत लपलेला जुनसर वास. मिणमिणती पणती, आसपास जाणवणारा जगण्याचा आभास . खरखरीत फरशी, तिथे घुटमळणारा वावरण्याचा त्रास . लटकत्या हिंमती ,त्यांच्यात असलेली गबाळेपणाची रास. हरलेल्या किंमती,त्यांत मिसळलेला अजीजीचा आवाज . मंद मंद भुवई, तिच्यात सामावलेला अनुभवाचा प्रवास . खडखडती नाणी,त्यांत अडकलेले अर्थशास्त्रही भकास . शून्यातली दृष्टी, तिच्यात कशी येणार सणाची मिजास? थकलेली पाटी, तिच्यातून उडलेली चैतन्याची आरास. श्वासांचीच विक्री, उच्छ्वासांचीच परवली, बदललेल्या जगाला 'Happy Diwali'. - अभिजीत