"Child's Play Is Serious Business" ह्या उक्तीवर आधारित… Anita Wadley ह्यांच्या "Just Playing" कवितेवरून स्वैर अनुवादित… ----------------------------------------------------------------- रचत असेन कधी, ठोकळे एकमेकांवर वाटत असेल अगदी, पोरखेळ हा तर ! शिकतो आहे मी, 'भार' आणि 'तोल' असेनही उद्या मी, 'आर्किटेक्ट' अनमोल.... १ हाती माझ्या बाहुली, भातुकलीचा खेळ नजर म्हणे तुमची, "आवरायला वेळ" ! 'जपणं' नि 'सांभाळणं' शिकवतो खेळ बनू उद्या 'आई'/'बाप' आम्ही एखादवेळ.... २ हातांवरती रंग, कधी चिखलातले कुंभार वाटती तुम्हाला, पोरखेळ हे भंगार ! 'सांगणं मनातलं' शिकवती ना खेळ 'कलाकार' उद्या मी, होईन एखादवेळ.... ३ श्रोते नाहीत कुणी, पण चढे वाचनास रंग म्हणता मात्र तुम्ही , पोरखेळात पुरता दंग ! 'समजणं' नि 'समजावणं' शिकवतो खेळ असेन उद्या मी चांगला, 'शिक्षक' एखादवेळ.... ४ फिरेन कधी झुडपांतून, खिशांत असे सटरफटर नक्की वाटेल तुम्हाला, फालतू वाया गेले पोर ! माहीत नाही अजूनि जे, ते शोधेल माझा खेळ तुम्हीच म्हणाल मला मग, 'संशोधक' एखादवेळ...५ भान माझं हरपून जाता, सोडवण्या एखादं कोडं म्हणू नका हं प्लीज आता, "काहीतरी करतं येडं" ! नुसता खेळण्यात नाही हो मी, वाया घालवत वेळ सोडवताना मी प्रश्न उभारेन, 'उद्योग' एखादवेळ...६ भांडीकुंडी खुडबुडेन, मिटक्या मारेन थोडावेळ तुम्हास नक्की वाटेल मग, भलतेसलते माझे थेर ! चवींमधले वेगवेगळे, फरक शिकवतो मजला खेळ चाखत-चाखत आंबट-गोड, 'बल्लव' होईन एखादवेळ…७ उड्या मारतो दोरीवर की, वारा धावत असेन चपळ तुमचं आपलं टुमणं की, 'देवासारखा बस अंमळ!' शिकतो आहे 'शरीर' आणि, हालचालींचा मेळ डॉक्टर, नर्स वा बहुधा, ऍथलीट होईन एखादवेळ...८ "काय केले शाळेत आज ? कसे होते दिवसाचे स्वरूप?" "फार काही केले नाही पण, खेळलो मात्र सगळे खूप!" रागवून आता म्हणू नका हं, "तुझे नुसते फालतू खेळ !" 'माझं' पेक्षा चांगलं 'आपलं', शिकायची ही तर वेळ...९ राहू द्याल 'आज' मला जर, स्वच्छंदी नि आनंदी पाहू याल 'उद्या' मला तर, यश ठेवेन पायाशी लहान आहे मी अजूनि, थांबा ना हो थोडावेळ कामात आहे पुरता गढुनि, दिसतो नुसता पोरखेळ !!!... १० --------------------------- www.atakmatak.blogspot.com ---------------------------