Skip to main content

कधी कधी

लेखक फ्रॅक्चर बंड्या यांनी शुक्रवार, 05/02/2010 16:01 या दिवशी प्रकाशित केले.

कधी कधी नभालाही वाटत असेल
घ्यावे धरतीला मिठीत
कधी कधी ढगांनाही वाटत असेल
शिरावे ह्या दरीच्या कुशीत

कधी कधी शिखरालाही वाटत असेल
खोल खोल दरीत उतरावे
अन कधी कधी दरीलाही वाटत असेल
उंचावरून जग पहावे

कधी कधी पावसालाही वाटत असेल
ओलेचिंब भिजावे
अन कधी कधी थंडीलाही वाटत असेल
उबदार गोधडीत शिरावे

कधी कधी उन्हालाही वाटत असेल
सर्वस्व सावलीला द्याव
अन सावल्यांनाही वाटत असेल
सोनसळी उन्हात नहाव ..

कधी कधी शब्दानांही वाटत असेल
कवितेला सजवावे
कधी कधी कवितेलाही वाटत असेल
शब्दांचेच होऊन जावे..

लेखनविषय:
वाचने 1506
प्रतिक्रिया 6

प्रतिक्रिया

अनिल हटेला शुक्रवार, 05/02/2010 17:32

कधी कधी पावसालाही वाटत असेल
ओलेचिंब भिजावे
अन कधी कधी थंडीलाही वाटत असेल
उबदार गोधडीत शिरावे

आहाहा.....:-)

(थंडावलेला)
बैलोबा चायनीजकर !!!
© 2006-2010. All rights reserved.

मेघवेडा शुक्रवार, 05/02/2010 17:52

असेच म्हणतो! मस्तच!!!

-- मेघवेडा.

आम्हाला अजून कुणाच्या खरडवहीत किंवा खरडफळ्यावर खरडायची अनुमती नाही. आम्ही काय करावे बरे? :O

शुचि शुक्रवार, 05/02/2010 22:14

हेच कडवं खूप आवडलं. कविताही सुंदर आहे.
*********************
काढ सखे गळ्यातील तुझे चांदण्यांचे हात
क्षितीजाच्या पलिकडे उभे दिवसाचे दूत

पक्या शुक्रवार, 05/02/2010 23:01

छान . पण शेवटचं कडवं तितकसं आवडलं / पटलं नाही.
अनेक शब्दातूनच कविता तयार होते. कविता शब्दांचीच असते मग कवितेला का वाटेल शब्दांचेच व्हावे?

जय महाराष्ट्र , जय मराठी !