'उत्तरायण' हा मराठी चित्रपट पाहिल्यानंतर लिहाव्या वाटलेल्या काही ओळी : "दुर्गी करशील का गं माझ्याशी लग्न ?" "खूप उशीर झाला रे रघू ...सगळ्या गोष्टी वेळेत व्हाव्या हेच होतं एक स्वप्न " "माझा जीव होता आधीपासून तुझ्यावर" "कधीच कळलं नाही रे; नसता सोसावा लागला घडलेल्या गोष्टींचा भार" "अजूनही वेळ नाही गेली उरलेले क्षण वेचत करू एकत्र प्रवास" "आयुष्याची संध्याकाळ झाली .. नको इतरांना आपल्या नवीन नात्याचा त्रास" "पुष्कळ भोगून झालंय तुझं .. उरलेल्या संध्येला तरी न्याय देऊ" "भिती वाटते मला सुखाची.. अगदीच खचून जाऊ" "जाऊ आपण दूर कोठे .. दु:खालाही न कळे वाट.. नव्या किरणांनी सुरू करू आयुष्याची नवी पहाट "

मनाच्या खोल गाभार्‍यात गर्भरेशमी भरजरी वातींच्या सुवर्णदिपांची एक माळ जळतेय . त्या चांद्ररुपेरी प्रकाशाची धग देहाच्या सर्व गात्रातून गरगरतेय . काही तुझ्यातील माझ्या स्मरणांच्या अन् काही माझ्यातील तुझ्या स्मरणांच्या या वाती . . या धगधगणार्‍या वातींवर निळ्या सुरमयी वार्‍याचा सणसणता आघात . विद्ध मनाच्या दग्ध उंबरठ्यावर एक अवघडलेला पाऊस उरलाय . सरता सरता ह्या पावसाने फक्त दोन वाती जळत्या ठेवल्यात . . जळता जळता जाळणा-या जाळता जाळता जळणा-या . मनाच्या खोल गाभा-यात खोल खोल खूप आत दिपांची तमा न बाळगता तमाशी झगडणार्‍या ओंजळभर तेलाची लाज राखण्यास . मनाच्या खोल गाभा-यात गर्भरेशमी भरजरी या वाती |- मिसळ