ते पुस्तकच आहे. दूर तुझ्या घरात ठेवलेलं काचेआड. एकदा तू वाचलेलं. तू तिथं नसताना मी वाचलेलं. तिसरं कुणीही ते वाचलेलं नाही. एकदा तू, नंतर मी. कथा तुझ्या डोळ्यांनी वाचली मी तुझे डोळे वाचले. ते पुस्तकच आहे? अजूनही? दूर तुझ्या घरात ठेवलेलं काचेआड... -शिवकन्या

प्राक्तनाचे संदर्भ अस्तित्वाचे प्रश्न आसपास उत्तरांचे तुकडे साकोळत राहिलो सुदंर कोलाज करता येईल म्हणून प्रत्येक चौकटीत शोधत राहिलो आकार मनात आधीच कोरून घेतलेले ठरवून घेतलेल्या रंगासहित सर्जनचे सोहळे सहज नसतात माहीत असूनही सोयिस्कर दुर्लक्ष करीत गेलो बहरून येण्याआधी उजाड व्हायचं असतं याचं भान राहिलंच नाही ऋतू हलक्या पावलांनी येत राहिले त्यांच्या सोहळ्याना अनेकदा सामोरा गेलोही पण त्यांच्यापर्यंत पोहचण्याआधी परतीला पावलं लागलेली असायची हाती उरायच्या विसर्जनाच्या देठ खुडलेल्या निष्प्राण खुणा स्वप्नाळलेल्या नेत्रात सुखांचे निर्झर शोधण्याच्या नादात ओथंबलेल्या पापण्यांची थरथर कळलीच नाही थेंबाना