दृष्टीस हिमनगाचा वरचाच बर्फ़ येथे. करतात मग कशाला भलताच तर्क येथे. लाखात मोल ज्यांचे कवड्यात भाव झाले. अर्थाशिवाय नसतो कुठलाच "अर्थ" येथे. निष्पाप अन निरागस ते वय निघून गेले. छळतो कटाक्ष आणि सलतात स्पर्श येथे. फुलशील केवड्यासम, ध्यानात ठेव तेव्हा, नसतात फक्त भुंगे, वसतात "सर्प" येथे. अश्रूत चिंब भिजल्या शब्दास भाव नाही लावायचा व्यथेचा हलकाच "वर्ख" येथे. -- अभिजीत दाते

ओंजळभर पाणी खूप तहान लागलीये, हो ना? ह्म्मं..मलाही, या वाळवंटात, चल,आपणच खोदूया एक विहीर, आपल्या दोघांसाठी,खोल-खोल.. मी माती सारते बाजूला थोडी, मग तूही सार माती थोडी, मग मी सारेन मोठाला दगड, तूही कर तसंच,अगदी तसंच.. आलटून-पालटून, आळीपाळीने, आपण सारत राहू एकेक सगळं खूप खोल खोल जाण्यासाठी.. मग कूठेतरी लागेल ओलावा, उत्साह दूणावेल आणि तहानही.. अचानक हाताला लागेल थोडंसं पाणी, अगदी थोडं-थोडकंच हं...!!! उडवून पाहीन मी ते पाणी, तूझ्या नाक,गाल, ओठांवर, शहारशील तू कदाचित, अचानक, पण ओठ जरा जास्तच हपापतील.. तूझा उजवा हात दे अन माझा डावा घे, बनवू आपण 'दोन' हातांची 'एक' ओंजळ, दोन हातांची नि दोन जीवांची