काही ठिकाणे काही आठवणी-३ (पुणे विशेष भाग)

आमच्याही काही पुण्याच्या आठवणी आहेत त्याबद्दल असेच नंतर कधीतरी

पुण्यात आमचे आगमन झाले २००७ साली, सोबतची पोरे इंजिनियर झाली, अन आम्ही उकिरडे फुकत वायडी होत बीएस्सी झालो, कॉर्पोरेट आपल्यासाठी नाही ही गाठ बांधत मनात यूपीएससी करून साहेब व्हायचे आले अन वडिलांच्या खंबीर सपोर्ट ने ते स्वप्न पुरे करायला पुण्यात २४/११/२००७ रोजी डेरेदाखल झालो. (ते लक्झरी बसचे तिकीट अकोला-पुणे अजूनही जपून ठेवलंय) . पहिले गेलो चाणक्य मंडळ तिथे त्या रिसेप्शनिस्ट ताई ने 'इकडे कुठे आला कपाशीला डवरे देणे सोडून' लुक दिल्यावर प्रबोधिनी मध्ये गेलो, तिकडे कोणीतरी शबनम बॅग वाल्या दादांनी '२००८ पूर्व परिक्षे करता प्रवेश बंद झालेत' असे सांगितल्यावर एकदम अवसान गळाले, म्हणले २ दिवस राहून दारू पिऊ मित्रांसोबत अन परत घरची वाट पकडू, असं ठरवून प्रबोधिनीहुन थेट सुटलो झेड ब्रिजावर. तिथे फाकफाक एक सिगरेट मारून खिशातली टोटल मोजली अन मित्राला बॅलन्स जाळत फोन केला "हॅलो राख्या कुठं आहेस बे? " "रूम वर" "माही ऍडमिशन नाही झाली लेका, आता रे?" "जाऊ दे ये रूम वर दारू पाजतो" "तू येतं का घ्याले मले डेक्कन वरी?" "बाप्पा, संग काही ^गुलाब बाबा बँड पार्टी बी आणा लागते काय मंग? " "ये न राख्या फोकनीच्या, लेका मले काही सुचू नाही राहले" "बायल्यावानी करू नको चु**रीच्या, सरका डेक्कन ले धस अन कोथरूड डेपो बस पकड, मी जास्तीत जास्ती पौड ब्रिज ले येईन घ्याले" "बरं तसंच करतो मंग, 10 मिंट लागतीन नाही रे?" "हौ! लेका जसा का तू मोठ्या उमरी मधून विठ्ठलनगरले चालला नाही रे होबाऱ्या?, अर्धा घंटा पकड" "बरं" असा काहीसा पुण्यात आल्या आल्या आमचा तिसरा तास होता, बाकी कधी लय जमली तर लिहून काढू, तोवर वाचत बसतो ^अकोल्यातली एक अकोलेमे वर्ल्ड फेमस बँड पार्टी ----------×--------------×--------- प्रबोधिनी जवळ "सांबर पोहे" "शिरा" मिळणारे ठिकाण म्हणजे उभे स्पोर्ट्स शेजारची पडकी बखळ, तिथे पोहे विकणारा उभे पार्टी पैकीच कोणीतरी एक होता, तिकडे कच्चुन नाश्ता केला की आम्ही 'उभ्याला आडवा केला' म्हणत परत लायब्ररी मध्ये जात असू, पुण्यात राहून यूपीएससी होऊ शकते, त्याला चांगला क्लास नाही चांगले वाचनालय शोधावे लागते, हा स्वानुभव (आयएएस हुकल्यावर झालेला साक्षात्कार) अनारसे सामोसेवाला फालतू आहे, त्याच्याच समोर एक डेअरी आहे नाव विसरलो, तिकडे त्याकाळी १०₹/ग्लासच्या दराला उत्तम ताक, रोज मिल्क, स्ट्रॉबेरी मिल्क वगैरे मिळत असे, अनियमित खाणे जागरण अन अभ्यासाने ऍसिडिटी झाली का आम्ही तिथे दुधाला जात असू

मस्त प्रतिसाद. सोन्याबापू लिहाच !