डॉ पटवर्धनांची केस

लंडनमधील प्रथितयश स्त्रीरोगविशेषज्ञ डॉ. महेश पटवर्धन यांना तेथील न्यायालयाने चार लैंगिक गुन्ह्यांच्या खटल्यात दोषी ठरवून आठ वर्षे कारावासाची शिक्षा फर्मावली आहे. हे गुन्हे त्यांनी 2008 ते 2012 या कालखंडात केल्याचे म्हटले जाते. वैद्यकीय तपासणीच्या वेळी या गृहस्थांनी आपल्याशी गैरप्रकार केले अशी तक्रार एकूण सहा स्त्रियांनी केली होती. पैकी चार गुन्हे सिद्ध झाल्याचे कोर्टाने नमूद केले आहे.

सदर डॉक्टरांचे स्वतःचे आंतरजालीय संकेतस्थळ आहे. त्यावरील माहितीनुसार हे साधेसुधे असामी नाहीत. मुंबईत जन्म, शिक्षण व उच्च शिक्षण झालेले हे डॉक्टर लंडनमधील अभिजनवर्तुळात वावरतात. लता-आशापासून सचिनपर्यंत सर्व थोरामोठ्यांसह त्यांची ऊठबस आहे. माझ्या वैद्यकीय क्षेत्रातील मित्रांनी दिलेल्या माहितीनुसार महाराष्ट्रातून लंडनला जाणाऱ्या सर्व चित्र-नाट्य कलावंतांचा मुक्काम डॉक्टरांकडे असतो. (संकेतस्थळावर अजय-अतुल ते मांजरेकर अशा अनेक नावांचा उल्लेख आहे).

डॉक्टर स्वतः एक कलाकार असून आशा भोसलेंसोबत त्यांनी एक गीतसंच मुद्रित केलेला आहे असेही संकेतस्थळावर म्हटले आहे.

त्यांच्या पत्नी समक्षेत्री व्यावसायिक (भूलतज्ञ) आहेत. निकाल वाचला जात असताना त्या आपल्या मुलांसह न्यायालयात उपस्थित होत्या.

या गृहस्थांना प्रत्यक्ष-अप्रत्यक्ष पणे ओळखणारे माझे काही डॉक्टर मित्र म्हणतात की सदर गृहस्थ हे निर्दोष असून हा सरळ ईर्ष्याजन्य घातपाताचा प्रकार आहे.

या खटल्याचे व साक्षीपुराव्यांचे तपशील डेली मेलसारख्या अनेक सनसनाटी वृत्तपत्रांत हातचे न राखता, रसभरित स्वरूपात छापण्यात आले असून ते वाचल्यावर आपण शक्ती कपूर किंवा रणजीत यांनी साकारलेल्या एखाद्या खलनायकाबाबत तर वाचत नाही ना, असा प्रश्न पडतो.

या प्रकरणात खरेखोटे काय आहे?

(अधिक माहितीकरिता डॉक्टरांचे नाव गुगलून पहावे.)