Skip to main content

मँगो वुईथ फ्रेश क्रिम अँड सॅफ्रन (मलई आणि केशरयुक्त आंबा)

लेखक प्रभाकर पेठकर यांनी मंगळवार, 23/04/2013 02:45 या दिवशी प्रकाशित केले.

चित्र उपलब्ध नाही

साहित्यः

हापुस आंबे - ४
व्हिपिंग क्रिम - १ कप
साखर - चवीपुरती
केशर - चिमुटभर.
वेलची पुड - चिमुटभर

कृती :

केशर दुधात किंवा पाण्यात मिसळून ठेवा.

आंब्याचा रस काढा. आवडीनुसार साखर मिसळून, मिक्सरवर फिरवून मुलायम करून घ्या.
व्हिपिंग क्रिम फेटून घ्या. घट्ट झालं पाहिजे.
क्रिम, वेलचीपुड आणि केशर, साखर घातलेल्या रसात मिसळून एकजीव करून घ्या.

हे मिश्रण सुंदरशा बाऊलमध्ये काढा. मध्यभागी आंब्याची एखादी छोटीशी फोड ठेवून आजूबाजूला केशराचे दोरे टाकून सजवा आणि सादर करा.

शुभेच्छा...!

वाचने 14698
प्रतिक्रिया 43

प्रतिक्रिया

अर्धवटराव मंगळवार, 23/04/2013 03:10

पण हा धागा बघुन "हेच का आमचे बल्लवाचार्य पेठकरकाका" असा नाराजीचा सुर उमटला मनात.
म्हणजे कसं, कि अर्जुनाने धनुष्य वगैरे फेकुन, लोड-गाद्या लावुन, मस्तपैकी गीता ऐकायला मांडी ठोकुन बसावं , आणि श्रीकृष्णाने एखाद्या भीकंभटाने रचलेलं चार ओळींच बौद्धीक प्रवचन वाचुन दाखवुन "आजचा क्लास संपला" असं जाहीर करावं, असं झालं.

अर्धवटराव

प्रभाकर पेठकर मंगळवार, 23/04/2013 03:15

का रे बाबा?

करून पाहा. स्वर्गीय आनंद देणारी पाककृती आहे.

पक पक पक मंगळवार, 23/04/2013 18:06

लहान तोंडी मोठा घास..
आंब्याचा रस मिक्सर मधुन काढला कि मुळ चवीत फरक पड्तो..नुसत्या बारीक फोडी करुन क्रिम मधे मिक्स केला तर जस्त छान लागतो. करुन पाहिल आहे.. :)

स्पंदना मंगळवार, 23/04/2013 05:52

अंहं! आंब्याचा रस मिक्सरमध्ये फिरवला की त्याची गोडी जाते.
गृहीणीच्या हाताने जो रस निघतो त्यातच बाकीचे सगळे मिसळुन मग करा हवे तर, पण तो मिक्सरला लावला की त्याची १०% तरी चव उतरते.
स्वानुभव.

जेनी... मंगळवार, 23/04/2013 08:52

हो हे अगदी खरय ... माझी आई सुद्धा आंबे हाताने कुस्करत बसते ...
मिक्सर मद्ध्ये रसाची चव जाते म्हणते ...
पण आईच्या हातचा आमरस खुप मस्त लागतो :)
आयेम लविन इट :)

बाकि पेठकर काका पाक्रु चवदार ... रसाळ ... अगदी गुळमाट :)

सस्नेह मंगळवार, 23/04/2013 17:06

हाताने पिळलेल्या आंब्याचाच खरा स्वाद !
बाकी पाकृ आमरसाची 'फास्ट्फूड' आवृत्ती वाटतेय..चित्र उपलब्ध नाही

कवितानागेश मंगळवार, 23/04/2013 09:18

आंब्याबरोबर दुसर्‍या कशाचीच चव खरं तर आवडत नाही. पण केशर ट्राय करुन बघेन. दिसायला तर खूपच सुंदर आहे डिश.

पियुशा मंगळवार, 23/04/2013 09:38

वॉव !
कालच मस्त आमरस ओरपल्याने जळ्जळ कमी झाली ;)
आज हा प्रकार करुन बघते :)

दिपक.कुवेत मंगळवार, 23/04/2013 10:59

आंबा आणि व्हिप्ड क्रिमचं कॉम्बीनेशन छान लागतं पण रस हातानेच काढलेला हवा (निदान मला तरी तस्साच आवडतो). वर म्ह्टल्याप्रमाणे मिक्सर मधे फिरवला कि नक्किच चव बदलते आणि जास्त सोफॅस्टिकेटेड वाटतो. ह्या शिवाय हे नुसतं डेझर्ट म्हणुन खायचं कि पोळिबरोबर?

शुचि बुधवार, 24/04/2013 00:15

मी ऐकलय नागपूरात खातात. चुकले असल्यास आधीच माफी मागते नाहीतर कोणाची तरी अस्मिता चुकून दुखावली जायची :(

सूड बुधवार, 24/04/2013 01:18

मला एका एमपी वाल्याने सांगितलं होतंन की गरमागरम भात, वाटीभर आमरस आणि चांगलं दोनेक चमचे साजूक तूप हे कॉम्बिनेशन ट्राय करुन बघ. धाडस करुन पाह्यलं, पण काही विशेष चव वाटली नाही. त्यापेक्षा आमरस पुरणपोळी हा बेस्ट ऑप्शन.

गणपा बुधवार, 24/04/2013 13:11

कोकणात आंब्याचे रसाळलेले बाठे आणि आमरसाला थोडी फोडणी (फोडणी + किंचीत मीठ + लालतिखट) देऊन त्याचे बाठे/सासव तयार करतात.
हा प्रकार भातावर, चपाती/पोळी किंवा नुसताच ओरपायलाही छान लागतो.

श्रीरंग_जोशी बुधवार, 24/04/2013 20:46

मी नागपूरकर नाहीये पण नागपूरात आमरस पोळीबरोबरच खाल्ला जातो याबाबत खात्री बाळगा.

मागे माझ्या दक्षिण कर्नाटकातील रूममेटने मी आवडीने आमरस बनवून पोळीबरोबर वाढल्यावर अशी काही प्राथमिक प्रतिक्रिया दिली की... जाउ द्या.. :-).

रेवती बुधवार, 24/04/2013 21:27

श्रीरंगपंत, आमरसाशी लावून खाण्याच्या पोळ्या वेगळ्या असतात हे आधी मला माहित नव्हते. नंतर गवसण्यांबद्दल समजले पण आणखी एक प्रकार काही वर्षंपूर्वी समजलाय. दोन फुलके करून एकमेकांवर नुसते कडा दाबून चिकटवल्यासारखे करायचे. नंतर लाटायचे नाही. आता तापलेल्या तव्यावर नेहमीसारखी पोळी भाजायची. ही नक्की फुगते. तव्यावरून काढल्यावर त्याच्या दोन पोळ्या सहज सुटून येतात. ती म्हणे आमरसाबरोबर खायची पोळी असते. छान लागते हेही आहेच. ;)

श्रीरंग_जोशी बुधवार, 24/04/2013 21:34

अरे व्वाम हे तर नव्यानेच कळले.

रोचक वाटत आहे ही पद्धत.

पाकृ येऊद्या!!

प्रभाकर पेठकर मंगळवार, 23/04/2013 12:01

काकाकाकू, गणपा, श्रीरंग_जोशी, अर्धवटराव, aparna akshay, पूजा पवार., लीमाउजेट, पियुशा, अक्षया, दिपक्.कुवेत आणि सुहास झेले.... मनःपूर्वक धन्यवाद.

काकाकाकू :सध्या आंब्यांचा मौसम आहे. तो मौसमच एक मोठ्ठा छळवाद आहे. आंबा अत्तिशय आवडतो पण.. डॉक्टर मनसोक्त खाऊ देत नाही. निदान मित्र-मैत्रिणींना खाऊ घालून त्यावरच समाधान मानतो आहे.

अर्धवटरावः अरे! येणार होतास मस्कतला नं! त्याचं काय झालं?

गणपा: When you don't get what you like, you must like what you get. केसर आंबा कधी चाखला नाही. पण करून पाहा.

aparna akshay,पूजा पवार : असेही क्रिम मिसळले की गोडवा जरा कमी होतोच. म्हणूनच साखर मिसळायची. अर्थात, आईच्या हातच्या रसाची चव कशालाच नाही. ही एक क्रिमी पाककृती आहे. त्यामुळे रस मुलायम असणे गरजेचे होते आणि म्हणूनच मिक्सरची मदत.

दिपक्.कुवेत: ही पाककृती डेझर्ट वर्गात मोडते. ह्याच पाककृतीत क्रिम ऐवजी चक्का (टांगलेले दही) मिसळले की 'आम्रखंड' तयार होते. ते मात्र पुर्‍यांसोबतच छान लागते. (पोळी बरोबर नाही.)

पैसा मंगळवार, 23/04/2013 12:54

काय म्हणू समजत नाहीये! डोळ्यांनीच खाऊन घेते. सोपी आणि एकदम देखणी राजेशाही पाककृती!

दिपक.कुवेत मंगळवार, 23/04/2013 15:04

हेच मिश्रण जर फ्रिजर मधे घट्ट केलं तर एक स्मुथ/सील्कि मलई आणि केशरयुक्त आंब्याची कुल्फि बनेल का?

अनिता ठाकूर बुधवार, 24/04/2013 12:49

हापूस आंब्याच्या रसात आणखी काही भर घालायची इच्छा मला तरी होत नाही. असे केल्याने मूळ चव उणावते.अर्थात, 'पसन्त अपनी अपनी....'!!!

प्रभाकर पेठकर सोमवार, 29/04/2013 09:37

पैसा, बॅटमॅन, धनुअमिता, चंबु गबाळे, दिपक्.कुवेत, Mrunalini, अत्रुप्त आत्मा, रेवती, मुक्त विहारि, अनिता ठाकूर, विसोबा खेचर आणि कच्ची कैरी सर्वांना मनःपूर्वक धन्यवाद.

दिपक्.कुवेत - प्रयत्न करून पाहायला हरकत नाही. करून पाहा आणि एक नविन पदार्थ मिसळपाववर सादर करा.

अनिता ठाकूर - तुमच्या मुद्द्याशी सहमत आहे. मात्र आमरस आणि ह्या पाककृतीची तुलना न करता एक नविन चव अशा दृष्टीने पाहिल्यास आवडायला हरकत नाही. शिवाय, येणार्‍या पाहुण्यांना एक साधी, सोपी आणि तरीही चविष्ट अशी 'स्वीट डिश' सादर करता येते. पाहुण्यांनाही आवडेल अशी खात्री आहे.