चौदाव्या आंतरराष्ट्रीय विज्ञानपरीषदेच्या शेवटच्या टप्प्यात स्वागत, तीनशेसाठ शोधांपैकी सर्वोत्तम `भूगर्भातून ऊर्जानिर्मितीच्या' प्रोफेसर रूसच्या संशोधनाला सर्वानुमते प्रथम पारितोषिक घोषित करण्यात येत आहे. डॉक्टर मायकेलनी आपले भाषण संपवले. " माझ्यामते निर्णय घेण्यात घाई होतेय " सर्वांच्या नजरा मंचावर येणार्‍या व्यक्तीकडे वळल्या. " तुम्ही वेळेनंतर संशोधन दाखल केलंय, प्रोफेसर केनेथ " मायकेल उत्तरले " वेळेपेक्षा निष्कर्षावर विचार करायला हवा, आणि निष्कर्ष कसे आहेत ते तुम्हीच जास्त चांगलं सांगू शकाल " केनेथचा हस्तनिर्देश मायकेलकडे होता. अपेक्षेने मायकेलकडे वळलेल्या नजरा त्याच्या प्रश्नार्थक चेहर्‍यावर आदळून परत मंचाकडे वळल्या, विजेत्याची ट्रॉफी आणि टेबलावरील रूसच्या संशोधनाच्या कागदांसहित केनेथ मंचावरून नाहीसे झाले होते. "याचा अर्थ याचे टेलीपोर्टेशन वरचं संशोधन खरंच यशस्वी होतं " मायकेल स्वत:शीच पुटपुटले.