.. .अक्षय अविरत निर्मळ

या भल्या पहाटे थोडे
मी तुझेच गाणे गावे
अन गात्रा मधले कोडे
अलगद सुटून जावे

ती वीण मखमली मनाची
अन श्वास समर्पित व्हावा
त्या जगनियंत्यासाठी
हा देहच निमित्त व्हावा

विरघळून जावे अलगद
मी पण माझे नुरावे
त्या अक्षय सुखामध्ये मी
अवचित भान हरावे

ते नकोच लौकिक जगणे
अन श्वासही संकोचावा
तू माझा अन मी तुझाच
हा भोगच अक्षय व्हावा

मी भरून पावलो अवघा
ही तुझीच मिठी अवखळ
मी विरून हलका होतो
अक्षय अविरत निर्मळ

- बंगलोर , १ ऑगस्ट २०१७, ०६.३६ वाजता