मराठी साहित्य, संस्कृती आणि लेखनाचे व्यासपीठ
प्रवेश करा | सदस्य व्हा
मिसळपाव

नवी पा.कृ.: ब्रह्माण्डाचे ऑम्लेट

अनन्त्_यात्री · · पाककृती
नका डोळयांसी वटारू | नका काना॑सी टवकारू शीर्षक योग्यची "पा.कृ."| वाटे जरी अस्थानी प्रथम ब्रह्माण्ड फेटावे | स्थल-काल कुपीत ठेवावे चांदण-चुऱ्याचे लवण घालावे |चवी पुरतेच फेटणी अणु-गर्भाचे सोलीव कांदे | (बारीक चिरायचे वांदे) फोडुनी तयांची पुष्ट दोंदे |ढकलावे फेटणी आदि-स्फोटाचा अग्नी पेटवा |आकाश-गंगेचा चढवा तवा तेजोमेघांचे तेल उडवा |दोन थेंबुटे त्यावरी फेटण त्यावरी हळू ओता | गुरुत्व-कालथ्याने अरता-परता ऑम्लेट होईल बोलता बोलता |कल्पांता पर्यंत या पा.कृ. चे प्रकाश-चित्र | देखू न शकती चर्म-नेत्र म्हणोनी तिचे रेखा-चित्र | सत्वर टाकावे कुणीतरी
वाचने 17548 वाचनखूण प्रतिक्रिया 34

गामा पैलवान 07/06/2017 - 18:00
आम्लेटाची गंधलक्षणे | की म्याक्सवेलची इक्वेशणे पसरतील अवखळपणे | प्रकाशवेगे इलेक्ट्रिक पूर्वपक्ष | त्यावर म्याग्नेटिकाचा कटाक्ष दुष्काळजन्य बुभुक्ष | आम्लेटावरी दोहोंचा खो -गा.पै.

गामा पैलवान 08/06/2017 - 18:38
अनन्त्_यात्री, तुमचे अणुगर्भाचे सोलीव कांदे फार म्हणजे फारंच आवडले! अणुमधले एसपीडीएफ वगैरे इलेक्ट्रॉन कवचे कांद्याच्या बाह्य सालींप्रमाणे सोलून काढण्याचा भास झाला. या कवचांसमोर अणुगर्भ अतिशय चिमुकला असल्याने तो चिरायचे वांधे सुद्धा झटकन डोळ्यासमोर तरळून गेले. :-) आ.न., -गा.पै.

अनन्त्_यात्री 09/06/2017 - 09:10
...नाद केला होता (इतर अभ्यास बुडवून) ते दिवस आठवले -जेव्हा तुम्ही एस्,पी, डी, एफ ऑर्बिट्सचा उल्लेख केलात! अगदी तेव्हापासून ही सोलीव का॑द्याची उपमा डोक्यात ठसठसत होती, ती या ऑम्लेट्च्या मिषाने लिहिली गेली. आपल्या मार्मिक प्रतिसादा॑बद्दल धन्यवाद!!

गामा पैलवान 16/06/2017 - 22:15
अरे वा, अनन्त्_यात्री! रसिक दिसताय या विषयांचे. :-) मलाही यांत आस्वादक म्हणून थोडीफार माहिती आहे. बाकी, तेलवाल्या तेजोमेघांचे दोन थेंबुटे म्हणजे मेगालनचे ढग की काय? आ.न., -गा.पै.

डॉ सुहास म्हात्रे 08/06/2017 - 18:50
तुमच्या अचाट कल्पनाशक्तीच्या विराट स्फोटातून तयार झालेल्या ऑम्लेटचा हा घ्या फोटो. त्यात तुमच्या धसमुसळेपणाने बाजूला उडालेल्या मिक्स्चरचा थेबही दिसत आहे :D ...

दशानन 08/06/2017 - 18:57
2 नंबरच्या भगव्या लाटेच्या अगदी बाहेर एका टोकाला आमची ग्रह मालिका आहे त्यात एक टोकावर आमची पुथ्वी आहे त्यात एका कणावर, इत्यादी इत्यादी मी हा प्रतिसाद पाहत आहे, भेटून आंनद वाटला साहेब ;)

अनन्त्_यात्री 09/06/2017 - 09:19
.....मगर उस्की फोटू काय्कू लायी? कबूल आहे जन्मजात धसमुसळेपणाने मिक्स्चरचा एक थे॑ब उडाला बाजूला. पण असे फोटो टाकून माझा नवशिकेपणा चव्हाट्यावर आणलात तर मी सुगरण कधी होणार अन माझी ऑम्लेट-पावाची टपरी चालणार कशी? :)

डॉ सुहास म्हात्रे 09/06/2017 - 21:40
माणूस म्हटले की कधी ना कधी चूक होणारच*. आपली चूक जाणून ती मान्य करणे ही सुधारण्याची आणि (ब्रम्हांडाचे ऑम्लेट बनवणारा) तज्ञ (पाककलाविषारद) बनण्याची पहिली पायरी आहे ! "मी कधीच्च चूक करतच्च नाहीच्च" ही प्रवृत्ती माणसाला आत्मकेंद्रित दांभिक बनवते ;) :) =============== * : "टू अर इज ह्युमन (To err is human)" हे जो विसरतो त्या ह्युमनची लोक सहाजिकपणे टर उडवतात. :-X

अनन्त्_यात्री 09/06/2017 - 09:31
..भेटली. सौस्क्रूत भाशा आपुन्ला तशी पन थोडी हार्ड पडते. हा, पन ऑम्लेट-पावची गाडीवाल्या चिमनला ऑम्लेट करताना एक डाव पाह्यल॑ त्याच टायमाला कायतरी लिवायसारख॑ वाटल॑.

नूतन सावंत 15/06/2017 - 15:14
आधी वाटलं की ब्राम्हणी मसल्याचे मटणसारखी पाककृती आहे की काय!पण वाचून मजा आली.कोणाला काय पाहून काय सुचेल आणि चांगल्या पद्धतीने शिजवून सादर करता येईलच असे नव्हे ,पण अनंतयात्री जमलंय बरं का आम्लेट आणि तो गा.पै.यांचा प्रतिसाद म्हणजे वरून शोभेसाठी भुरभुरलेले चीज आणि कोथिंबीर म्हणता येईल.

अनन्त्_यात्री 15/06/2017 - 15:39
..म्हणजे केवळ ब्रह्माण्डी ऑम्लेटवर शोभेसाठी भुरभुरलेले चीज आणि कोथिंबीर नसून चीज (वीज) आणि कोथि॑बीर ( चु॑बकत्व) या॑ची मॅक्सवेल सायबाने केलेली चटणी प्रकाशवेगाने पसरून त्या॑नी अण्ड्याच्या फण्ड्यालाच हात घातलाय.

सत्यजित... 22/06/2017 - 18:17
कवितेचा (की पा.कृ.चा) बाज जरा खट्याळ-मिश्किल स्वरुपाचा असला तरीही,मानवी मनाच्या ठायी असलेली सूक्ष्मातीसूक्ष्मता तसेच भव्यातीभव्यता,व आपल्या भवतालाठायी असलेल्या याच गुणांशी,सम-विशेषाांच्या अनन्त शोधातच,संगत जोडू पाहणारी ही 'रचना','अनन्त_यात्री'चे अभिनंदनास समर्पक कारण आहे! अवांतर—मला आवडलेल्या कवितांमध्ये,पाडगांवकरांची 'आम्लेट' कविताही अत्यंत मार्मिक आहे!सहज आठवली अत्ता!