Skip to main content

वंचनांचे खर्चही पडताळणे आता नव्याने

लेखक विशाल कुलकर्णी यांनी गुरुवार, 02/02/2017 11:43 या दिवशी प्रकाशित केले.

शोधतो मौनात कविता, वाहणे आता नव्याने
मूळ अस्तित्वास फिरुनी शोधणे आता नव्याने

कोणत्या त्या राऊळी वसतो हरी सांगा गड्यांनो
माणसांच्या अंतरी डोकावणे आता नव्याने

भूक, तृष्णा, वासनाही वाटती कां क्षुद्र आता?
अस्मितेला मृगजळी धुंडाळणे आता नव्याने

तू मला गोंजारणेही सोडले आहे अताशा
वंचनांचे खर्चही पडताळणे आता नव्याने

माणसांना शोधतो मी श्वापदांची कोण गर्दी
लष्कराच्या भाकरी बघ भाजणे आता नव्याने

मोल भक्तीला न उरले, 'जा'च तू येवू नको रे
विघ्नहर्त्या हात जोडुन मागणे आता नव्याने

विशाल कुलकर्णी

काव्यरस
मराठी गझल
लेखनविषय:
वाचने 6628
प्रतिक्रिया 22

प्रतिक्रिया

कपिलमुनी शुक्रवार, 03/02/2017 16:44

एकंदरीत मिपावर काव्य विभागात दुष्काळच असतो !
एक काव्य स्पर्धा आय्प्जित करा

राघव सोमवार, 06/02/2017 10:25

छान लिहिलेयस! :-)

कोणत्या त्या राऊळी वसतो हरी सांगा गड्यांनो
माणसांच्या अंतरी डोकावणे आता नव्याने

भूक, तृष्णा, वासनाही वाटती कां क्षुद्र आता?
अस्मितेला मृगजळी धुंडाळणे आता नव्याने

हे दोन शेर विशेष आवडलेत.