मी ..... कोण ?

मी ..... कोण ?

मी कोण तुम्ही कोण
जन्माच्या वेळीच ठरवतात
जात ,पात ,धर्म,देश
ओळख तेव्हाच सांगून टाकतात !
'मी' म्हणायच्या आधी
"तू कोण " हे शिकवून टाकतात !

आधी होते बर मी यजुर्वेदी
लग्नानंतर झाले म्हणे ऋग्वेदी,
कुटुंबामध्ये आमच्या
आहेत कोकणस्थही चार ,
बिल्डिंग मध्ये आहेत ब्राम्हणच फार !

कॉलनीमधले मला 'मराठी'
म्हणून ओळखतात
शहरात इतर ठिकाणी फिरताना
'कोणत्या भागातली' म्हणून विचारतात ?

शहराबाहेर गेले तर ही' पुण्याची '
असे म्हणाले लोक ,
परप्रांतात गेले तेव्हा
'महाराष्ट्रयीन' म्हणाले ते कैक .

आज देशाबाहेर आले तेव्हा
'भारतीय' म्हणून संबोधले गेले
भारताचा गर्व करते न करते तोच
'एशियन' म्हणून निवडले गेले .

अंतराळात गेले असते
तर ही 'पृथ्वीवरची'
परग्रहावरचे म्हणाले असते ,
जर गेले असते जंगलात
तरच ते 'प्राणीच' बहुधा
मला
फक्त "माणूस" म्हणाले असते !

-------फिझा