Skip to main content

बाप्पाचा नैवेद्यः आंबा मोदक

लेखक अनन्न्या
सोमवार, 05/09/2016 या दिवशी प्रकाशित केले.
1 . साहित्यः आटवलेला आंब्याचा रस एक वाटी, साखर दोन वाट्या, वेलची पावडर, पाणी, मोदकाचा साचा . 1 . कृती: दोन वाट्या साखर कढईत घ्या. त्यात एक वाटी पाणी घाला. मध्यम गॅसवर ठेवून ढवळत रहा. साखरेचा गोळीबंद पाक करायचा आहे. एका वाटीत अर्धी वाटी पाणी घ्या. पाकाचा थेंब पाण्यात टाकून पाहा. पाकाची घट्ट गोळी झाली की गॅस बंद करा. आता या पाकात चिमूटभर वेलची पावडर घाला आणि लगेच रसाचा गोळा मिसळा. खाली उतरून घोटत राहा. चांगला गोळा झाला की मोदकाच्या साच्यात घालून मोदक करा. याच्या वड्या करायच्या असतील तर गोळा झाल्यावर ताटाला तूप लावून त्यात गोळा थापा आणि वड्या पाडा. आमरसाचा सुंदर स्वाद आणि रंग येतो या मोदकांना! . 1
वाचने 22622
प्रतिक्रिया 45

प्रतिक्रिया

प्रा.डॉ.दिलीप बिरुटे सोमवार, 05/09/2016
जब्रा....आवडले मोदक. -दिलीप बिरुटे

प्रभाकर पेठकर सोमवार, 05/09/2016
चविष्ट दिसताहेत. मस्तच.

नाखु सोमवार, 05/09/2016
मुख्य म्हणजे जमण्यासारखे.. ता.क. आटवलेला रस म्हणजे "देसाई बंधूंचा " विजय पलप समान काही का? नक्की काय नावाने मागायचा दुकानात? (अगदी बाळबोध प्रश्न आहे पण निराकरण व्हावे म्हणून विचारले. वरील प्रश्न देसाई बंधूंची जाहीरात नाही हे समजून घेणे.. जाहीर आत नाखु

अनन्न्या सोमवार, 05/09/2016
देसाई बंधू माझ्या माहेरच्या गावचे पण त्यांच्याकडे कोणत्या नावाने मिळतो हे नाही माहित. रस आटवलेला असावा पण त्यात वरून पिठीसाखर मिसळलेला नको. आटवलेला रस विचारल्यावर कळेल देसाईबंधूना!

रुस्तम सोमवार, 05/09/2016
अनन्न्या ताई तुम्ही आटवलेला आंब्याचा रस घरी कसा बनवता ?

अनन्न्या मंगळवार, 06/09/2016
चुलीवर मोठ्या पराती ठेऊन त्यात आंब्याचा रस काढून आटवत ठेवला जातो हा रस खूप उडतो म्हणून लांब दांडयाचे लाकडी उलथे वापरतात. रस आटत आला की त्यात साखर घालून परत आटवतात. घट्ट होत आला की गार करायला ठेऊन मग गोळे करून ठेवतात. हे गोळे वर्षभर चांगले टिकतात. माझ्या माहेरी असा आटवलेला रस करून विकायला ठेवतात तो मी आणते.घरी करताना कढईत थोड्या प्रमाणात करता येतो पण मी मे महिन्यात माहेरी जाऊन तिथून करून आणते.

मोक्षदा सोमवार, 05/09/2016
अनन्या , छान झाले आहेत मोदक फोटो चांगले,

मदनबाण सोमवार, 05/09/2016
थाळीतले मधले मोदक मी फस्त केले आहेत असे समजुन घ्यावे, बाकीचे उरलेले प्रसाद म्हणुन वाटण्यास हरकत नसावी ! ;)

मदनबाण.....

आजची स्वाक्षरी :- माझा गणपती... :- मी येतोय

दिपक.कुवेत सोमवार, 05/09/2016
गणेश उत्सवाच्या खुप खुप शुभेच्छा आणि आंबा मोदक खासच झाले आहेत. तोंपासू फोटो

अनन्न्या सोमवार, 05/09/2016
या सर्वांनी गणपती बघायला आणि मोदक खायला!

स्वाती दिनेश सोमवार, 05/09/2016
मोदक सुरेखच दिसत आहेत. पाकॄ तर छानच! बाप्पाच्या नैवेद्याची सुरूवात झकास! स्वाती

सविता००१ सोमवार, 05/09/2016
अनन्या, मस्तच दिसताहेत मोदक. मस्त सुरुवात नैवेद्यासाठी.

केडी सोमवार, 05/09/2016
।।गणपती बाप्पा मोरया।। सुंदर आहे पाकृ.

सस्नेह मंगळवार, 06/09/2016
सुरेख आणि नाजूक नैवेद्य !

मास्टरमाईन्ड मंगळवार, 06/09/2016
तोंडाला पाणी सुटलं ना!! आख्खं ताट भरून आंबा बर्फी संपवू शकेन (एका वेळेस बास होतील कदाचित) मस्त! आवडलं.

सूड मंगळवार, 06/09/2016
सुंदरच!! सध्या उकडीच्या मोदकाच्या सारणात नारळाचा चव+आमरस असं करण्याचा विचार चालू आहे. बघू कसं जमतंय.

पैसा मंगळवार, 06/09/2016
कर आणि नक्की सांग! पातोळ्या पण अशा वेगवेगळ्या सारणाच्या छान लागतात म्हणून विचार करत होते की मोदक पण चांगले लागतील.

स्वाती दिनेश मंगळवार, 06/09/2016
फार सुरेख लागतात रे असे मोदक. हवे तर उकडीत किंचित केशरी रंगही घाल. फार सुरेख दिसतेही आणि चव तर भन्नाटच येते. तसेच नारळाच्या सारणात गुलकंद घालूनही छान होतात. उकडीचे,तळणीचे मोदक, करंज्याही.. :) स्वाती

सुमीत भातखंडे मंगळवार, 06/09/2016
तोंपासु :)

स्रुजा बुधवार, 07/09/2016
फार, फार सुरेख. तुझ्या सगळ्याच पाकृ अप्रतिम असतात आणि मला तुझं त्यातलं साधेपणातलं सौंदर्य फार भावतं.

अनन्न्या बुधवार, 07/09/2016
एवढ्या साध्या पाकृला भरभरून प्रतिसाद दिल्याबद्दल! माझी आई हे मोदक करून विकायची गणपतीत, त्यामुळे मी देणारच नव्हते.

पिलीयन रायडर गुरुवार, 08/09/2016
साधी?!! अगं तुझ्या पाकृ पाहुन असं वाटतं की हे जमेल आपल्याला! खुप काही तरी फॅन्सी बघायला भारी वाटलं तरी पटकन करावं वाटत नाही. पण तुझ्या पाकृ मात्र अगदी आईनेच समजावुन सांगितलंय असं वाटतं! साधं.. सोपं.. आणि सुंदर!