Skip to main content

मी आयफोन-कर

लेखक विश्वेश यांनी रविवार, 14/08/2016 00:08 या दिवशी प्रकाशित केले.

तुम्हाला कोण व्हायचे आहे आयफोन-कर, एनड्रोइड-कर कि विंडोज-कर

... आता तुम्हाला आयफोन-कर व्हायचं का? जरूर व्हा. आमचे काही म्हणणे नाही. पण मुख्य सल्ला असा, की पुन्हा विचार करा अगदी आग्रहच असेल, तर मात्र कंबर कसून तयारी केली पाहिजे, आणि एकदा तयारी झाली, की त्या सारखी मजा नाही ,तुम्हाला सांगतो.
पहिली गोष्ट म्हणजे- कसलाही न्यूनगंड बाळगू नका. आणि प्रत्येक फोन च्या फिचर वरून मतभेद करायला शिका. म्हणजे आपल्या फोन मध्ये आहे का, आपल्या फोनमधील फिचरचा दर्जा काय, एकूण उपयोग काय, याचा अजिबात विचार न करता मत ठोकून द्यायचं. म्हणजे आता "स्मार्ट-फोन खरा कसा असला पाहिजे?" या विषयावरती, आपण फ़क़्त फोन करणे, लघु संदेश करणे इतकाच फोन वापरता, हे विसरून मत ठणकावता आले पाहिजे. स्मार्ट-फोन खरा कसा असला पाहिजे? - ठोका.
दिवसातून एकदा तरी "स्टीव जॉब्स होता तेव्हा ..." हे म्हणायलाच पाहिजे. हे वाक्य म्हणायला वयाची अट नाही. इथे म्हणजे दहा वर्षाचा मुलगा सुद्धा चाळीशीच्या अनुभवाचे गाठोडं असल्यासारखं ते चारचौघांपुढे उघडत असतो. त्यामुळे "च्यायला, स्टीव जॉब्सच्या वेळी हे असलं नव्हतं" हे वाक्य कॉलेज, ऑफिस, दुर्गा, के एफ सी, सी सी डी, आणि युरो किड्स, कुठेही ऐकायला मिळेल, "स्टीव जॉब्सच्या वेळी ते तस नव्हतं!"
आयफोन-कर व्हायला कसल्यातरी गोष्टीचा जाज्ज्वल्य अभिमान हवा- नुसता नाही, जाज्ज्वल्य अभिमान. मग तो अगदी स्टीव्ह जॉब्स चा, किंवा एपल चाच असला पाहिजे असे काही नाही. म्हणजे आपण आयफोन किती महाग घेतला, किती वेळ रांगेत उभे होतो, सीम कार्ड कसे कट केले ह्या पर्यंत कुठल्याही गोष्टीचा असला तरी चालेल. पण जाज्ज्वल्य अभिमान हवा. मतभेद व्यक्त करायला या जाज्ज्वल्य अभिमानाची फार मदत होते. म्हणजे ब्लू-टूथ किवा डाऊनलोडच्या ऐवजी, आय-ट्युन्स मधून उगाच गाणी विकत घेणे, वायरलेस सिन्क सतत करणे, एस डी कार्ड च्या ऐवजी आय-क्लाऊड वर गोष्टी ठेवणे - अशी त्या त्या अभिमानाची नीट वाटणी करता येते आपल्याला. आपला मतभेद केवळ खासगी मध्ये व्यक्त करून आयफोन-कर थांबत नाहीत. अधून मधून फेसबुक वर, आपल्या ब्लोग वर आयफोन बद्दल स्तुती लिहावी लागते इतर ओ एस चा अपमान करावा लागतो. इमेल ला मुद्दाम "सेंट फ्रॉम आयफोन !" अशी स्वाक्षरी द्यावी लागते. त्यासाठी लेखनाची स्वातंत्र्य शैली कमवायची, हे अत्त्यंत आवश्यक आहे.

थोडक्यात म्हणजे आयफोन-कर व्हायचं असेल, तर म्हातारपणा पर्यंत सगळे सोफ्टवेअर आणि अभिमान विकत घेऊन वापरणाच्या दिशेने वाटचाल करायच धोरण सांभाळावे लागते.

लेखनविषय:
लेखनप्रकार
वाचने 8198
प्रतिक्रिया 29

प्रतिक्रिया

मिसळपाव रविवार, 14/08/2016 01:38

जम्या, जम्या!

टिपः माझा आयडी 'मिसळपाव' असला, मिपाच्या बाल्यावस्थेत तत्कालीन चालकांच्या संमतीने घेतलेला, तरी मी एक सामान्य सभासद आहे. या आयडीचा आणि या संस्थळाच्या चालकांचा / संपादकांचा काहीही संबंध नाही.

सतिश गावडे रविवार, 14/08/2016 10:07

आय फोन का मजा तुम क्या जानोगे एंड्रोइड और विंडोज बाबू.

आय फोनमध्ये आयच्या प्रेमाचा जिव्हाळा आहे, जो एंड्रोइड और विंडोज फोनमध्ये नाही.

मुक्त विहारि रविवार, 14/08/2016 10:43

सध्या तरी आमच्याकडे नोकियाचे जुने मॉडेल आहे आणि ते अद्याप तरी बोलणे-ऐकणे व्यवस्थित करत आहे.

शिवाय सुडोकू पण आहे आणि बोनस म्हणून घड्याळ आणि ते पण अलार्म सकट.

शिवाय ते पोकेमॉन सारखी भानगड नाही आणि लगेच चार्ज होतो.

शिवाय चार्जिंग टिकते पण २-३ दिवस.

(अज्ञानी) मुवि

गामा पैलवान रविवार, 14/08/2016 12:25

समोरचा फोन विंडोज किंवा सिम्बियनचा असला तरी 'तुमच्या अँड्रॉईडछाप फोनचं ...' अशा तुकड्याने संभाषणाची सुरुवात करावी. मात्र फार डिटेलमध्ये जाऊ नये. नाहीतर कोणी अँड्रॉईडवाला तुम्हाला रूट अॅक्सेस मिळवायचे सत्राशेसाठ प्रकार ऐकवेल. वर तुमचा फोन कारामुक्त (=जेलब्रोकन) आहे का असंही विचारेल. ही मात्र खरोखरंच आणीबाणीची परिस्थिती आहे. अशा वेळेस 'कारामोचन करून काय माझ्या आयफोनास जनरल अँड्रॉईडछाप बनवू का', असं बोलून एक तु.क. टाकावा.

-गा.पै.

कंजूस रविवार, 14/08/2016 13:39

ब्लॅकब्री ची सर कुणालाच नाही हे आइफोनवालेही जाणून असतात.त्या दुख:वर मीठ म्हणून एक मि डॅालरस मोजून हॅकरकडून आरोपीचा आइफोन ब्रेक करवून घेतला न्यु पोलिसांनी.

चौथा कोनाडा सोमवार, 15/08/2016 17:37

झक्कास लिहिलंय, विश्वेशभाऊ, म्हन्जे मस्तच जमलंय !
बघुयात तुमच्या लेखणीतून कोण कोण बाहेर येतयं !
पुलेप्र !

श्रीरंग_जोशी सोमवार, 15/08/2016 23:51

=))

बाकी आम्हा बीबी१० वाल्यांची याबाबत भूमिका म्हणजे, "आग लगे बस्ती में, हम अपनी मस्ती में".

- रंगा करवंदीकर

चिनार मंगळवार, 16/08/2016 13:55

मस्त जमलाय..
अजून वाचायला आवडेल..
आमची स्मार्ट फोनची व्यथा खालील दोन लेखात मंडळी आहे..
https://www.misalpav.com/node/27462
https://www.misalpav.com/node/36533

मी-सौरभ बुधवार, 17/08/2016 12:55

कल्पना विस्तार मस्त केलाय. अजुन थोडा मोठा लेख असता तर जास्त मज्जा आली असती.

बब्बा बुधवार, 17/08/2016 17:49

मुंबईकर, पुणेकर कि नागपूरकर ह्या पु ल च्या मूळ कथाकथानातील...... "पुणेकर" ह्या स्वभावविशेषाचा छान वापर केलाय.