लकेरी

अंत कवटाळला फिरस्ता
चिरे वाकडी वाट
फुटल्या दिव्यांच्या काचा
कापती अंधाराची लाट ||

गच्च झुडपात वाजे
झिंगल्या रातकिड्याचां झांज
अस्ताला गेली दूर
वाट सांडली सांज ||

कुणी चुकला छायाचित्रकार
टिपे प्रकाशाचे कवडसे
वाहत्या वा-यासवे धुळीत
हरवले गेले ठसे ||

आणे उधाण वारा
शरीर भरल्या प्रणयास
वाढत्या जवळकीने घुमती
मोकाट सुटले श्वास ||

घुमे वा-याची शीळ
उघड्या तलावाच्या शिरी
दर्ग्यातुनी अलगद येती
प्रार्थनेच्या सुरेल लकेरी ||

विजयकुमार........
०४.११.२००९, महाबळेश्वर