"एक जीभ बाहेर काढलेली स्मायली ! "

-० स्थळ १ नाना नानी पार्क ०-
कांही जेष्ठांचे चर्चा सत्र
० अॅंड्रॉइड म्हणजे काय?अॅंड्रॉइड स्मार्ट फोन म्हणजे काय?आम्हाला ते शिकायचं आहे! ---- एका जेष्ठ म्हणतो!
० आम्हाला पण!------ दुसरा जेष्ठ
० आम्हाला पण।------ तिसरा जेष्ठ
० पण बाळासाहेबांना त्याची गरज नाही ,त्याना सगळं येतं! --
० ते कसं?
० त्यानाच माहित.
० कांहो बाळासाहेब गप्प कां?
० हं! हं!
० आज काल क्लास असतात. लावला असेल एखादा ,बोलतात कां बघा.
० हं! लावलाय.घरीच येतो एक जण शिकवायला .
० तरीच! आम्हाला शिकवेल? फी?
० रविवारी घरीच या विचारू.
-० स्थळ २ बाळासाहेबांचे घर. सर्व जण गोळा. चहा पोहे उरकलेले. ०-
बाळासाहेब हॅंडसेटशी कांही चाळा करतात.
तोच आतून दहा एक वर्षाचा नातू पळत बाहेर येतो.आणि म्हणतो,
० आजोबा काय हे? व्हॉट्स अॅप वरून अजून तुम्हाला स्माइली सेंट करता येत नाही?
किती वेळा सांगायचं?
बाळासाहेब त्याला जवळ घेतात.
० पुन: नाही चुकणार गुर्जी
असं म्हणून त्याच्या जावळाचा मुका घेतात
आणि गुर्जी ही आपली फी म्हणून त्याच्या हातावर एक कॅडबरी ठेवतात.
आणि जीभ बाहेर काढलेली स्माइली सगळ्याना पाठवायला हॅंडसेट हातात घेतात.