[शतशब्दकथा स्पर्धा] हाक !

"अंबामाय वाचवं गं माझ्या लेकराला....अहो आई बोलवा ना गजाननाला!!...सगळे शांत का बसलेत ?कोणी काहीच कसं करत नाही..डॉक्टरसुद्धा म्हणाले घरी घेऊन जा त्याला..आता काहीच होऊ शकत नाही..देवा काय करू मी आता?

कुठून अवदसा आठवली अन होटेलात जेवायला गेलो आज..माझं लेकरू टेबलापाशीच खेळत होतं..थोडं दुर्लक्ष झालं..बगीच्यातली पाण्याची टाकी दिसली त्याला..गेला हो धावत तिकडे नी पाय घसरला..दोन-तीन मिनिटे पाण्याच्या तळाशी होता..ह्यांनी उडीच मारली त्याला बाहेर काढायला...शुद्ध हरपलीये त्याची..श्वास सुरु आहे फक्त..

सगळे नातेवाईक जमलेत..ह्यांची अवस्था तर बघवत नाहीये..शून्यात बघतायेत कुठेतरी..फार जीव हो त्यांचा लेकरावर.
ऐ बाळा..उठ ना रे..रोजच्यासारखी हाक मार ना मला......"

तेव्हढ्यात एक आवाज आला..
"आई...........आई!"
(सत्यकथेवर आधारित)