मराठी साहित्य, संस्कृती आणि लेखनाचे व्यासपीठ
प्रवेश करा | सदस्य व्हा
मिसळपाव

रगडा पॅटिस

सानिकास्वप्निल · · पाककृती
. साहित्य रगड्यासाठी: १ मोठी वाटी पांढरे वाटाणे स्वच्छ धुवून ६-७ तास भिजवून ठेवणे १/४ टीस्पून हिंग १/२ टेस्पून हळद १-१/२ टीस्पून लाल तिखट (आवडीप्रमाणे कमी-जास्तं) १ टीस्पून काळा मसाला मीठ चवीनुसार १ टीस्पून चिंचेचा कोळ . पाकृ: पांढरे वाटाणे हिंग व हळद घालून कुकरला मऊसर शिजवून घ्या. पातेल्यात तेल गरम करुन त्यात शिजवलेले वाटाणे, लाल तिखट, काळा मसाला, मीठ, चिंचेचा कोळा व थोडेच पाणी घालून उकळी आणा. रगडा नीट शिजला की गॅस बंद करा. (आवडत असल्यास फोडणीत चमचाभर आले+लसूण पेस्ट परता) . साहित्य पॅटिससाठी: ४-५ बटाटे उकडून, सोलून, किसून घ्या म्हणजे पॅटिस करताना गुठळ्या राहणार नाही. २ टेस्पून आले+ लसूण+ हिरवी मिरची वाटून (तुम्ही पेस्ट वापरु शकता, मला भरडसर वाटलेले आवडते म्हणून तसे घेतले आहे) १/२ टीस्पून हळद १/४ टीस्पून चाट मसाला मीठ चवीनुसार मैदा बाईंडिंगसाठी . पाकृ: बटाट्याच्या मिश्रणात वाटलेले आले+ लसूण+ हिरवी मिरची, हळद, चाट मसाला, मीठ व मैदा घालून चांगले मिक्स करावे. मिश्रणाचे छोटे गोळे घेऊन चपटे करुन पॅटिस तयार करावे. नॉन-स्टिक तव्यावर तेल घालून पॅटिस दोन्ही बाजूंनी खमंग शॅलो फ्राय करावे. . साहित्य सर्व्हिंगसाठी: बारीक चिरलेला कांदा बारीक चिरलेली कोथींबीर चाट मसाला चिंच-खजुराची चटणी ( १ वाटी चिंच गरम पाण्यात भिजवून त्याचा कोळ काढून घ्यावा, गरम पाण्यात १/२ वाटी खजूर भिजवून, वाटून घेणे. चिंचेचा कोळ उकळायला ठेवावा, उकळी आली की त्यात गुळ , वाटलेला खजूर, लाल-तिखट, सुंठपूड, जीरे पावडर व मीठ किंवा सैंधव घालावे.) पुदिन्याची चटणी ( मुठभर कोथिंबीर, मुठभर पुदिना, हिरव्या मिरच्या, लिंबाचा रस, मीठ, जीरे व साखर एकत्र वाटून चटणी बनवणे.) वरुन घालायला शेव/ फरसाण (इथे शेव सहज मिळत नसल्यामुळे मी फरसाण वापरले आहे तुम्ही भरपुर शेव घालून सर्व्ह करु शकता :) ) . सर्व्हिंगः एका प्लेटमध्ये रगडा घालून घ्या त्यावर तयार पॅटिस ठेवावे. आता त्यावर पुदिन्याची चटणी व चिंच-खजुराची चटणी घालावी. वरुन चिरलेला कांदा व कोथींबीर घालावी. वरुन शेव/ फरसाणने गार्निश करुन सर्व्ह करावे. . रगडा पॅटिस खाण्यासाठी तयार आहे :) .
वाचने 25270 वाचनखूण प्रतिक्रिया 58

रुपी Wed, 04/08/2015 - 02:43
मागच्या आठवड्यातच केले होते त्यामुळे फार जळजळ झाली नाही!

अत्रन्गि पाउस Wed, 04/08/2015 - 05:09
लोक रात्री अपरात्री हे वाचून अस्वस्थ होताहेत ...आमचे बरे आहे कि पहाटे पहाटे हे वाचतोय ... खड्ड्यात गेला तो चहा ... एक ४ प्लेट पाठवून द्या हो कुणीतरी ...आणि हो ..वाटीभर आंबट दही मिळाले तर बघा बरे लागेल ह्या सगळ्यावर ... सानिका ताई ..लैच भारी बर्रका

मुक्त विहारि Wed, 04/08/2015 - 06:12
गोरेगावला एक पाणी वाली बाई होती. एका सिनेमात कलमवाली बाई पण येवून गेली. आता ह्या मिपावर पण, पाणीवाली(आनंदाश्रू)+फोटोवाली+कलमवाली बाई आहेच. जावू दे... मुवि म्हणे, वाखूसा करावे आणि गप्प बसावे.

अत्रुप्त आत्मा Wed, 04/08/2015 - 07:42
@ आता ह्या मिपावर पण, पाणीवाली (आनंदाश्रू)+फोटोवाली+कलमवाली बाई आहेच. जावू दे...>> +++१११ समांतर:- पुन्हा पुन्हा यायला होतय या धाग्यावर! :-\ मिपा खाद्यसंम्मेलन झालच पायजे! चराळ कमिटि.. खफगाव.

विशाखा पाटील Wed, 04/08/2015 - 09:25
कसं काय जमतं बुवा हे सगळे जिन्नस असे व्यवस्थित वेगवेगळ्या द्रोणात, लहानमोठ्या बाऊलमध्ये, झालंच तर चमच्यांमध्ये व्यवस्थित भरायचे, त्याचे असे छान छान फोटू काढायचे...

स्मिता श्रीपाद Wed, 04/08/2015 - 11:03
तोंडाला पाणी सुटलं...सकाळी सकाळी अशी डीश पाहिली आता दिवसभर सुचणार नाही काही...किती हा छळ म्हणते मी... खरच कसं काय जमतं ग तुला असं सगळ आधी मांडामांड करुन छान छान फोटो काढ्त काढत स्वयंपाक करायला.... ग्रेट आहेस गं... नमस्कार तुला _/\_

अनिता ठाकूर Wed, 04/08/2015 - 12:18
माझ्या गुजराथी शेजारणीने मला रगड्यासाठी खास मसाल्याची कृती दिली होती. ती पुढीलप्रमाणे:- धणे अर्धा किलो काळी मिरी अर्ध्या वाटीपेक्षा थोडी कमी जीरे अर्धी वाटी लवंग १० - १२ बडी वेलची ५० ग्रॅम दालचीनी १० ग्रॅम तमालपत्र १० ग्रॅम बडीशेप अर्धी वाटी हळकुंड १ बडीशेप नुसतीच थोडी भाजून घेणे. बाकीचे जिन्नस थोड्या (१ - १ चमचा ) तेलावर वेगवेगळे भाजून घेणे. दळून घेणे.

प्रा.डॉ.दिलीप बिरुटे Wed, 04/08/2015 - 12:35
अरे यार यांचं कै तरी करा राव. कुठे तरी कोणत्या तरी विषयावर भांडन करावं लागतं यांच्याशी मिपावर. म्हणजे राग येऊन मिपावर तरी येणार तरी नै या... :/ -दिलीप बिरुटे

मी_आहे_ना Wed, 04/08/2015 - 13:29
कुठून जेवणाचा डबा उघडण्या-आधी हा धागा उघडला असं झालंय :( सानिकाताई ... अप्रतीम सादरीकरण, पोटातल्या कावळ्यांचे निर्वाण झाले आहे! समोर असं रगडा पॅटिस आल्या-शिवाय परत भूक लागू देणार नाही म्हणून गेलेत...

मनिमौ गुरुवार, 04/09/2015 - 12:43
शनिवार चा मेनु मिळाला आहे. नेहमी प्रमाणेच मस्त सुंदर

दिपक.कुवेत गुरुवार, 04/09/2015 - 15:28
अगं का? छ्या आता करावेच लागणार. पॅटिस मधे बाईंडिंग साठि मैदा घालतात हे नव्याने समजले. मी ब्रेड ओला करुन घालतो.

कविता१९७८ Tue, 04/14/2015 - 15:44
सानिका, आज साहीत्य आणलंय, तुझ्या सारखी सुगरण नाहीये मी पण प्रयत्न नक्की करणार आहे.

रेवती Wed, 04/15/2015 - 16:27
नेहमीप्रमाणेच छान पाकृ व जलजले फोटू. मीही असाच करते हा पदार्थ. अख्खे वाटाणे भिजवून शिजवताना टरफलामुळे अख्खेच राहतात किंवा अगदी गाळ होत नाहीत पण माझ्याकडे बीनसालाची वाटाण्याची डाळ आहे. त्याने हा पदार्थ करायला गेल्यास अगदी गिचका होतो. आता ती डाळ कशी संपवावी याबद्दल काही आयड्या आहेत का? (ती डाळ नवर्‍याने चुकून हरभरा डाळ म्हणून दुकानातून आणली होती)

सूड Wed, 04/15/2015 - 16:57
आता ती डाळ कशी संपवावी याबद्दल काही आयड्या आहेत का?
वाटाण्याची डाळ फार वापरलेली नाही, पण वाफेवर शिजवून भाजी वैगरे करता येईल ना?

रेवती Wed, 04/15/2015 - 17:40
अरे ती जरा वाफवली की शिजून गाळच होतीये. काहीतरी नवा पदार्थ तयार करावा लागणार बहुतेक! ही डाळ महाराष्ट्रीय पदार्थांमध्ये फारशी वापरल्याचे ऐकीवात नाही.

आदूबाळ Wed, 04/15/2015 - 19:56
(ती डाळ नवर्‍याने चुकून हरभरा डाळ म्हणून दुकानातून आणली होती)
नवर्‍याला हरभर्‍याची उसळ म्हणून खपवता येईल का?

रेवती गुरुवार, 04/16/2015 - 02:44
अरे थांबा, थांबा! यातील काहीही होणार नाहीये. सूप एरवी पाचक म्हणून घेतात. या डाळीचे सूप पोट बिघडवणारे असेल अशी शंका येतीये. आता अगदी कमी पाण्यात शिजवून वडे ट्राय करते. अदूबाळ, तुम्ही ग्रोसरीतून चुकीचा पदार्थ आणल्यास अर्धांगिनी काय करते हे तिला व्यनि करून विचारते. ;)

रॉजरमूर गुरुवार, 06/04/2015 - 21:06
खूप छान .....! . आजच केले रगडा पॅटिस छान झाले ...... सादरीकरण नेहमीप्रमाणे अप्रतिम