रितेपण

श्वासांचं गुदमरणं काही नवीन नाही आताशा
तू मनात नुसता डोकावलास जरी..
तरी एक मोठ्ठा आवंढा घशात...
आणि मनाची उलाघाल थेट डोळ्यांपर्यंत.
...
वर्तमानातल्या प्रत्येक गोष्टीला
तुझ्याशी रिलेट करणं....
आपसूकच !!
पण तू कुठेच नसल्यामुळे आलेलं रितेपण...
असंच गुदमरतं....व्यक्तच होता येत नाही त्याला.
अधून मधून स्वप्नांचं खेळणं येतं मदतीला
खेळत बसते तास्‌ न्‌ तास
अगदी भान हरपून....
तुझ्याशीच असतो डाव मांडलेला
पण जिंकणार तूच...
मी मात्र तुझ्या विजयावर कायम खुश...
तुझ्या जिंकण्याचं मला नेहेमीच कौतुक वाटतं.
तुझ्यावर विजय मिळवावा असं कधी वाटलंच नाही मला
पण....
एकदा तरी मलाही जिंकू दे ना....
मी जिंकल्यावर कधी तरी टाळ्या वाजव...
अगदी मनापासून...
मलाही आवडेल रे ते....!!
...
राहिलं....
असू दे.
पण खेळ नको संपवूस रे...
मला खेळायचंय तुझ्यासोबत.
तुझ्या प्रत्येक विजयी खेळीचा भागीदार व्हायचंय
प्लीज...
...
कंटाळलास का रे...
नाही त्रास देणार मी तुला...
नाही बोलावणार खेळायलाही
पण.... मला सांग..
तुला मी आठवेन ना रे....
खूप खूप दूर गेल्यावरही...
कधी तरी...
एकदा तरी...