अवेळी असे मेघ दाटून येता.....

अवेळी असे मेघ दाटून येता
जुन्या वेदनांनी पुन्हा पाझरावे.
जरी कष्ट झाले विसरण्यास ज्याना
जुन्या त्या क्षणांना पुन्हा आठवावे.....

कितीदा पडावे, कितीदा वहावे
धडे अनुभवांचे किती साठवावे.
किती आर्जवे अन किती ती प्रतीक्षा
किती चातकाने मना समजवावे ....

पुरे ओढ वेडी घनांची अनावर
दुरूनी अता पावसा न्याहळावे..
जपावा मनातील पाऊस थोडा
परी भावनांच्या पुरा थोपवावे....

अवेळी असे मेघ दाटून येता
मनाच्या नभाला जरा आवरावे....

लेखनविषय:	कविता

वाचने 4622

प्रतिक्रिया 21

प्रतिक्रिया

भिंगरी शनिवार, 28/02/2015 18:52

मनाच्या नभाला कसे आवरावे?

संदीप डांगे शनिवार, 28/02/2015 19:30

तुमच्या या प्रश्नाने 'संक्षि'प्त आठवणी दाटून आल्या... :-)

(कविता ज्याम आवडली... आताही बाहेर नभ दाटून आले आहेत आणि पाऊस सुरू आहे. कविता एकदम समयोचित झाली.)

अत्रुप्त आत्मा शनिवार, 28/02/2015 19:41

कविता ज्याम आवडली... आताही बाहेर नभ दाटून आले आहेत आणि पाऊस सुरू आहे. कविता एकदम समयोचित झाली.)

>>> शत प्रतिशत सहमत! :Happy:

सहमत. आवडली कविता.

-दिलीप बिरुटे

ह्या ओळी विशेष...