Skip to main content

मुळ्याची पालेभाजी

लेखक डॉ सुहास म्हात्रे यांनी शुक्रवार, 30/01/2015 00:11 या दिवशी प्रकाशित केले.
मिपावर बरेच जण पाकृ टाकतात. मग "आम्हीच का मागे रहावे ?" असे आम्हाला सारखे वाटत राहिले तर त्यात नवल काय ? याच मेंदूभृंगाने छळल्यामुळेच केवळ घरात नेहमी आवडीने केली जाणारी आमच्या आवडीची मुळ्याची पालेभाजी जरूर सर्व त्या साभार अनुमत्या-परवानग्या घेऊन टाकत आहे. यात धाग्यात आमचा हक्क फक्त भारवाही हमालाचा आहे असे आम्ही अगोदरच झायीर करत आहोत, गैरसमज नसावा. :) साहित्य : आठ-दहा मध्यम आकाराची मुळ्याची पाने + १ मध्यम आकाराचा मुळा २ मोठ्या मिरच्या ४ लसणीच्या पाकळ्या १ मध्यम आकाराचा कांदा १० ते १५ ग्रॅम गूळ १/२ वाटी खवणलेले ओले खोबरे २ चमचे गोडेतेल चवीनुसार मीठ

..

कृती : १. पाने व मुळा धुऊन घ्या. पाने बारीक चिरा. मुळा किसून घ्या. २. कांदा, मिरची आणि लसूण बारीक चिरून घ्या.

..

३. कढईत २ चमचे तेल तापवून घ्या. त्यात मिरची आणि लसूण चांगले परता.

४. त्यात कांदा घाला आणि तो लालसर होईपर्यंत परता. नंतर चिरलेला मुळ्याचा पाला आणि किसलेला मुळा घाला व दोन मिनिटे परता.

..

४. आता मीठ घालून एक खोलगट झाकण ठेवा. झाकणात थोडे पाणी घाला यामुळे मुळ्याला सुटलेले पाणी वाफेच्या रूपाने बाहेर न जाता परत कढईतच पडते. अश्या तर्‍हेने मुळा स्वतःच्या पाण्यातच पाच मिनिटे शिजू द्या. मिठाने पाल्यास पाणी सुटते त्यामुळे भाजीत अधिक पाणी घालण्याची गरज नाही.

५. गूळ फोडून भाजीत घाला आणि परत २ ते ३ मिनिटे झाकणाखाली शिजू द्या. ६. झाकण काढून २-३ मिनिटे भाजी परता व थोडी सुकी झाल्यावर खवणलेले अर्धे ओले खोबरे परतून नीट मिसळवा.

..

७. उरलेले खोबरे भाजी सजवायला वापरा.

गरम गरम भाजी नुसती चपाती/पोळी बरोबर खा...

अथवा नेहमीच्या जेवणातली पालेभाजी म्हणून वाढा...

...आणि ताव मारा, अजून काय ?
वाचने 14172
प्रतिक्रिया 33

प्रतिक्रिया

मुक्त विहारि शुक्रवार, 30/01/2015 00:18
झक्कास.. तोंपासु... आमच्या कडे ह्या भाजीत मुगडाळ वापरतात.

शिद शुक्रवार, 30/01/2015 04:18
आमच्या कडे ह्या भाजीत मुगडाळ वापरतात.
असेच म्हणतो.

रेवती शुक्रवार, 30/01/2015 00:23
काय मस्त फोटू आलेत! पाकृही झकास, घरगुती आहे. अशीच भाजी फक्त कांदा न घालता करत असते. आता याप्रकारे करून पाहीन. अगदी परवाच भारतीय दुकानात फक्त पाला विकायला ठेवला होता म्हणून घेतला नाही व दुसरे दिवशी हामेरिकन दुकानात फक्त मुळा दिसला. दोन्ही जोडीने विकायला यांचे काय जाते ते एक देवास ठाऊक!

स्रुजा शुक्रवार, 30/01/2015 00:38
अगदी अगदी ! मी पाक्रु वाचताना हाच विचार करत होते की २ खेट्या घालून मुळा आणायला लागणार. पण मी आणणार , माझी आजी कराय्ची ही भाजी पण तेन्व्हा कधी पाक्रु विचारली नाही. तुम्ही आता दिली तर नक्की करणार :) फोत्टो साधे आणि म्हणून च सुन्दर :)

आजानुकर्ण शुक्रवार, 30/01/2015 00:29
शेपू, मुळा, कांद्याची पात, कोबी वगैरे उग्र वासाच्या सगळ्या भाज्या आवडतात. सोबत मूगडाळ घालतो.

डॉ सुहास म्हात्रे शुक्रवार, 30/01/2015 01:35
मलाही अगोदर आवडत नसे. पण या प्रकारे करून पहा, आवडेल.

पिवळा डांबिस शुक्रवार, 30/01/2015 03:41
फोटो मस्त आहेत. पाककृतीही झकास असणार. पण काय आहे की आमच्याकडे मुळा फक्त एकाच कामासाठी वापरतात. चिरून तुकडे डाळीच्या आमटीत घालायला! राग नसावा. अवांतरः बाकी वाफाळणारा भात ह्या मुळा घातलेल्या डाळीच्या आमटीत कालवून सोबतीला नुकत्याच तव्यावरून उतरलेल्या तळलेल्या बांगड्याबरोबर काय झक्कास लागतो! :)

डॉ सुहास म्हात्रे शुक्रवार, 30/01/2015 12:02
तो बेत आमच्याकडेही आवडता आहे :) पण शाकाहारी जेवणात ही पालेभाजी मजा आणते.

श्रीरंग_जोशी शुक्रवार, 30/01/2015 05:58
गेली अनेक वर्षे ही भाजी खाल्ली नाही. या लेखनापासून प्रेरणा घेऊन मुळ्याची पालेभाजी करून बघीन.

सानिकास्वप्निल शुक्रवार, 30/01/2015 13:09
मस्तं दिसतेय भाजी. आमच्याकडे ह्यामध्ये गुळ न घालता त्यात सुके बोंबिल घालून , परतलेली भाजी फार आवडते. इथे ही पाला असलेला मुळा मिळतच नाही, लाल छोटे मुळे मिळतात त्याचे आणि पांढर्‍या मुळयाचे पराठेच जास्तं बनतात घरी. फोटो आवडला आहे, खासकरून चवळीच्या उसळीसाठी ;) अगदी फेव्हरीट उसळ :)

पैसा शुक्रवार, 30/01/2015 13:58
पाकृ आणि सादरीकरण झकास! मात्र या भाजीत मी गूळ आणि लसूण घालत नाही. एकदा घालून बघेन.

डॉ सुहास म्हात्रे शुक्रवार, 30/01/2015 16:06
जरूर करून पहा. गूळ आणि लसणीने मुळ्याची तीव्र चव कमी होते आणि भाजी जास्त चवदार बनते.

विटेकर शुक्रवार, 30/01/2015 14:19
फोटो झकास ! विटुकाकू पण करते .. पन मला ही भाजी जरा चरबट लागते म्हणून आवडत नाही. मी मुळा नुस्ताच तोंडी लावायला घेतो. भाकरी आणि कोणतीही अन्य फळभाजी सोबत कच्चा मुळा ताटात स्वर्ग आण्तो ( मला ते काप केलेले आवडत नाही , तसाच तोडत तोडत खायचा, मज्जा येते )

डॉ सुहास म्हात्रे शुक्रवार, 30/01/2015 16:11
पाकृत दिलेले पदार्थ विषेशतः गूळ व ओले खवणलेले खोबरे यांच्यामुळे चव मस्त होते. झाकणावर पाणी ठेऊन शिजवण्याच्या पद्धतीमुळे भाजीला चरबटपणा येत नाही... उघड्या भांड्यात शिजवलेली भाजी तशी होते. करून पहा. तुम्हाला कच्चा मुळा आवडतो म्हणजे वर सांगितल्याप्रमाणे केलेली भाजी नक्कीच आवडेल.

उमा @ मिपा शुक्रवार, 30/01/2015 16:13
दर आठवड्याला बनणारी भाजी. छान लागते. ओल्या खोबऱ्याचा सढळ हस्ते वापर असल्याने घरात सर्वांची आवडती. फोटो छान आलेत, विशेषतः साहित्याच्या फोटोत लसूण ठेवण्याची स्टाईल आवडली. चवळीची भाजी कशी केलीय तेही सांगा.

डॉ सुहास म्हात्रे शुक्रवार, 30/01/2015 16:25
सहमत ! तांदळाची भाकरी आणि मुळ्याची भाजी... वाह् !!! *pleasantry*

पिंगू शुक्रवार, 30/01/2015 21:22
मुळ्याची भाजी घरी सहसा करतात, पण मी तिच्या वाटेला उग्र वास असल्याने जात नाही. एकदा प्रयत्न करुन बघावा म्हणतो.. खाण्याचा.

डॉ सुहास म्हात्रे शुक्रवार, 30/01/2015 23:34
वरची पाकृ वापरून करा. उग्र वास निघून जातो आणि चवदार भाजी होते.

कंजूस शनिवार, 31/01/2015 08:28
मुळ्यात गुळ जरा नवीन वाटले. वाघाच्या गळ्यात घंटा बांधून मांजर कशाला बनवायचे राहू दे ना वाघ्या.

डॉ सुहास म्हात्रे शनिवार, 31/01/2015 14:32
पहिले मलाही तसेच वाटले होते. पन यकडाव तशी करून बगा... कायकी बा, पन आवडंल बी एखांद्या येळंला :)

दिपक.कुवेत शनिवार, 31/01/2015 23:32
डोळे (स्वःताचेच चोळून दोनदा खात्री करुन घेतली आहे). असो भाजी फर्मास दिसतेय. ईथे सुद्धा नुसताच पांढरा भाग मिळतो. आता पाला शोधणे आले.

डॉ सुहास म्हात्रे शनिवार, 31/01/2015 23:36
मग ! आमच्या हाताला चव नाही... पण जीभेला चोचले आहेत ना !! शिवाय किचनात शिजवायची नाही पण नस्त्या डायरेक्टरगिर्‍या करण्याची आवड आहे ;)