मुघलाई अंडा मसाला

साहित्यः उकडलेली अंडी २ नग. डालडा (किंवा तत्सम) तूप १/२ कप. मध्यम आकाराचे कांदे २ नग. दही १-१/२ (दिड) कप. आलं पेस्ट १ मोठा चमचा (टेबल स्पून). धणे पावडर १ मोठा चमचा. जीरे पावडर १ चहाचा चमचा (टी स्पून). बडिशोप पावडर १ चहाचा चमचा. मसाला वेलची (बडी इलायची) २ नग. काळीमिरी २० नग. लवंग १० नग. दालचीनी १० इंच. केशर चिमुटभर. (थोड्या गरम पाण्यात भिजत घाला.) केवडा वॉटर (ऐच्छिक) १ मोठा चमचा. कोथिंबीर सजावटीसाठी कृती. कढईत तुप तापवून त्यावर कांदा लालसर होईपर्यंत परतून घ्या. तेलातून काढून थंड हो द्या. नंतर थोडे पाणी घालून त्याची पेस्ट करून घ्या. दही फेटून घ्या. वेलची, काळीमिरी, लवंग, दालचीनी ह्यांची पावडर करून घ्या. त्यात धणे पावडर,जीरे पावडर, बडीशोप पावडर मिसळून त्यातच दही, कांद्याची पेस्ट, केशर, केवडा वॉटर मिसळा. आता कढईतील तुप पुन्हा तापवून त्यात हे वरील मिश्रण घालून मंद आंचेवर परतत राहा. मसाला शिजून तुप वर आले की आवश्यकतेनुसार पाणी घालून रश्याचा दाटपणा नीट करून घ्या. रस्सा फार पातळ नसावा. छायाचित्रात दिसतो आहे त्यापेक्षा थोडा पातळ केला तर चालेल. आता त्यात उकडून ठेवलेली अंडी प्रत्येकी दोन उभे भाग करून मिसळा. गॅसवरून उतरवून कोथिंबीरीने सजवा. शुभेच्छा...!