राम राम मंडळी, या पत्राद्वारे मिसळपाववर आम्ही आणिबाणी जाहीर करत आहोत याची सर्वप्रथम सर्वांनी कृपया नोंद घ्यावी. मराठी भाषेमधून 'जे जे उत्तम, उदात्त, उन्नत महन्मधुर ते ते' या न्यायाने इथे उत्तम ललित, तसेच वैचारिक लेखन लोकांना करता यावे, इतरांच्या लेखनाचा आस्वाद घेता यावा म्हणून हे संकेतस्थळ सुरू करण्यात आले. सुरवातीला काळजीवाहू पंचायत समिती, त्यानंतर निवडणुका व निवडून आलेली पंचायत समिती या घटनांमधून मिसळपाववर लोकशाही तत्वे आणण्याचा प्राथमिक प्रयत्न झाला. परंतु लोकशाही ही संकल्पना देखील अनेक कंगोरे, अनेक छटा असणारी संकल्पना आहे आणि तिलाही बर्‍याच फेजेसमधून जावे लागते. मिसळपाववरील सद्य पंचायत समितीपैकी दोन सन्माननीय सदस्यांनी आम्हाला थेट पत्र पाठवले नसले तरी आपले राजिनामावजा लेखन मिसळपाववर इतरत्र केल्याचे आमच्या पाहण्यात आहे. इथपर्यंतचा कालावधी ही मिसळपाववर लोकशाही तत्वे राबवण्याची प्रथम फेज (मराठी शब्द?) समजून, तूर्तास आम्ही येथील सद्य पंचायत समिती बरखास्त करून येथे आणिबाणी जाहीर करत आहोत. मिसळपावच्या पंचायतसमिती वरील पाचही सदस्यांचे आम्हाला इथपर्यंत सहकार्य केल्याबद्दल त्यांचे आम्ही अगदी मन:पूर्वक जाहीररित्या आभार मानतो. त्यांचे योगदान व सहकार्य मिसळपाव कधीही विसरू शकणार नाही अशी कृतज्ञता आम्ही त्यांच्याबद्दल व्यक्त करतो. सुदैवाने मराठी आंतरजालावर वावरण्याचा समृद्ध अनुभव आमच्या गाठीशी आहे आणि त्या अनुभवातूनच आमच्या असे निदर्शनास आले आहे की, काही मंडळी इथे केवळ हेतूपुरस्सर वाद निर्माण करणे, नेहमीच्या ललित, वैचारिक लेखना-वाचनापासून लोकांना दूर घेऊन जाण्याचा प्रयत्न करणे, रोज उठून नवीन चर्चाविषय सुरू करून मिसळपावच्या बहुसंख्य लोकांचे दैनंदिन मनस्वास्थ बिघडवणे, असे प्रकार करताना आम्हाला आढळले. मिसळपावच्या पंचायत समिती सदस्यांचे सहकार्य घेऊन, त्यांच्याशी योग्य तो सुसंवाद साधून हे विषय हाताळणे, मिसळपावच्या समाजकंटंकांवर धाक निर्माण करणे या गोष्टीं करण्यास आम्ही कमी पडलो असे जाहीररित्या कबूल करत आहोत! अर्थातच, वर म्हटल्याप्रमाणे लोकशाहीदेखील अनेक फेजेस मधून जाते तशीच मिसळपावच्या लोकशाहीचीदेखील ही प्रथम फेज होती एवढे आपण ध्यानात घ्यावे, ही विनंती. आता या बाबतीत पुन्हा नव्याने काय करायचं, काय नाही, मिसळपावच्या हिताच्या दृष्टीने कोणती पावले उचलावी हे आम्ही काही सेन्सिबल आणि मिसळपावच्या हितामध्ये ज्यांना खरोखरंच रस आहे अश्या मंडळींशी चर्चाविनिमय करून यथावकाश ठरवूच! गणेशचतुर्थी पासून आजपर्यंतच्या येथील सर्व सभासदांच्या, वाचकांच्या आशीर्वादाने मिसळपावने इथपर्यंत प्रवास केला. आजपर्यंत मिसळपावच्या अनेक सभासदांनी येथे काही उत्तम ललित लेखन केले, वैचारिक लेखन केले आणि मिसळपावला इथपर्यंत आणून सोडले ही श्री गजाननाची, आई योगेश्वरीची आणि आई अंबाबाईची कृपा! आणि यांच्याच आशीर्वादाने यापुढचा प्रवासही मिसळपाव करील असा विश्वास आम्हाला वाटतो! आजपर्यंतचे मिसळपाव हे कितपत यशस्वी झाले, कितपत अयशस्वी झाले हे आम्हाला माहिती नाही. त्यातील यशाचा जो काही वाटा असेल तो पंचायत समितीचे सदस्य आणि मिसळपावचे इतर सर्व सदस्य यांचाच आहे, व अपयशाचा संपूर्ण वाटा हा अमच्या एकट्याचा आहे, जे काही दोष आहेत ते आमच्या एकट्याचेच आहेत! असो.. या क्षणापासून मिसळपाववर आम्ही आणिबाणी लागू करत आहोत अशी पुनश्च एकदा घोषणा करत आहोत. दरम्यानच्या काळात मिसळपाववरील कथा,काव्य,रसग्रहण, रसास्वादादी ललितलेखन, निरनिराळ्या विषयांवरील वैचारिक लेखन, हे सर्व सुरूच राहील आणि मिसळपावच्या मेजॉरिटी सभासदांना त्याचा आनंद मिळतच राहील. किंबहुना याच बहुसंख्य सभासदांच्या लेखनात, वाचनात, रसास्वादात काहीही खंड पडू नये आणि या गोष्टी त्यांना आनंदाने, स्वतःचं मनस्वास्थ्य न बिघडवता करता याव्यात याच हेतूने ही आणिबाणी जाहीर केली जात आहे याचीही कृपया सर्वांनी नोंद घ्यावी! इथून पुढे मिसळपावसंबंधी सर्व सूचना कृपया आम्हाला पोष्टकार्ड पाठवून कराव्यात अशी सर्वांना नम्र विनंती. सर्वांच्या सूचनांचे, आणि विचारांचे निश्चितपणे स्वागतच केले जाईल आणि त्यातील इष्ट आणि व्यवहार्य सूचनांचा मिसळपावच्या पुढील वाटचालीकरता उपयोग केला जाईल याची ग्वाही आम्ही देत आहोत! सबब, इथून पुढे मिसळपावसंबंधी कोणत्याही सूचना आम्हाला पोष्टकार्ड न पाठवता जाहीरपणे केल्यास त्या पटलावर राहतीलच असे सांगता येत नाही याचीही कृपया नोंद घ्यावी ही नम्र विनंती! कळावे, आई अंबाबाईच्या नावानं चांगभलं! आपला नम्र, सरपंच.