Skip to main content

दिवा आणि ती

लेखक अमेय६३७७ यांनी बुधवार, 11/12/2013 16:15 या दिवशी प्रकाशित केले.

सजतानाही थिजलेली ती 
रोज मनाचे द्वंद्व मनाशी 
भिंतीवरती बापुडवाणा 
दिवा एकटा जळे स्वतःशी 

बोथटलेली जुनी वेदना 
जशी काजळी दिसे दिव्याची
जळता अवचित विझून जाणे 
हीच वंचना जन्मभराची 

अशा तमातुन प्रकाश कोठे 
कुणी कुणाचा ना कैवारी
दिवा जळो वा शील, सुखाचे   
मोल सारखे त्या बाजारी 

तिजला ठावे दैव स्वतःचे 
आयुष्याच्या सरत्या वाती  
जोवर आहे तेल वाहते 
दाह सोसणे उरले हाती 

-- अमेय

लेखनविषय:
वाचने 2806
प्रतिक्रिया 14

प्रतिक्रिया

राघव बुधवार, 11/12/2013 19:45

खूप सुंदर लेखन. येऊ देत अजून.

अवांतरः

छळ मांडलाय या माणसानं.. अरे किती भिडणारं लिहिशील?
तू कविता करून मोकळा आणि आम्ही विचार करून सर्द! :)

अत्रुप्त आत्मा गुरुवार, 12/12/2013 14:44

राघवाशी पूर्ण सहमत!

@छळ मांडलाय या माणसानं.. अरे किती भिडणारं लिहिशील?
तू कविता करून मोकळा आणि आम्ही विचार करून सर्द! Smile >>> तंतोतंत!