२०१४ च्या लोकसभा निवडणुकांसाठी मिपावर प्रकल्प

नमस्कार मंडळी, २०१४ च्या लोकसभा निवडणुकांसाठीची "सेमीफायनल" समजल्या जाणाऱ्या राज्य विधानसभा निवडणुका पूर्ण झाल्या आणि निकालही जवळपास पूर्ण जाहिर झाले आहेत.आता लवकरच लोकसभा निवडणुकांचे पडघम वाजू लागतील.या निवडणुकांसाठी मिपावर पुढील दोन प्रकल्प चालवायचा माझा इरादा आहे. १. प्रश्नमंजुषा: लोकसभा निवडणुकांवर मी बऱ्यापैकी काठिण्यपातळीचे एकूण २० प्रश्न तयार केले आहेत. जमल्यास अजूनही प्रश्न तयार करायचा प्रयत्न असेल.साधारणत: जानेवारीच्या पहिल्या आठवड्यापासून मे महिन्याच्या पहिल्या आठवड्यापर्यंत (निवडणुका १५ मे च्या आसपास पूर्ण होतील असे गृहित धरून) दर ५-६ दिवसांनी एक अशाप्रकारे ते प्रश्न मिपावर प्रसिध्द केले जातील.इच्छुकांनी त्या प्रश्नांची उत्तरे व्य.नि वरच पाठवावीत ही विनंती.पुढचा प्रश्न प्रसिध्द करण्यापूर्वी आधीच्या प्रश्नाचे उत्तर जाहिर केले जाईल. २. पडघम-२०१४ ही लेखमाला: पूर्वीच्या निवडणुकांच्या आकडेवारीचे विश्लेषण करून त्या आधारावर २०१४ मध्ये काय होऊ शकेल याचा ढोबळ अंदाज बांधणे असे या लेखमालेचे स्वरूप असेल.नक्की किती लेख होतील हे आताच सांगता येणार नाही.पण साधारणपणे पुढील प्रश्नांची उत्तरे त्यातून मिळतील अशी अपेक्षा आहे: * राज्य विधानसभा आणि लोकसभा निवडणुकांच्या मतदानामध्ये फरक असतो का?असल्यास कसा? * ज्याला प्रस्थापित-विरोधी मत (Anti-incumbency) म्हणतात ते नक्की आकड्यात कोणत्या स्वरूपात दिसते? * अनेकदा मते जास्त पण जागा कमी अशी परिस्थिती असते.त्याचे नक्की कारण काय? * तिरंगी आणि चौरंगी लढतीमध्ये बऱ्यापैकी जागा मिळवायला (क्रिटिकल मास) नक्की किती मते मिळाली पाहिजेत? * विविध बॅटलग्राऊंड राज्ये आणि तिथली परिस्थिती या व्यतिरिक्त कोणत्या प्रश्नाचे उत्तर विश्लेषणातून मिळणार असेल आणि ते प्रश्न माझ्या लक्षात आले नसतील तर ते जरूर विचारावेत ही विनंती. या दोन्ही प्रकल्पांमध्ये इच्छुक मिपाकरांचे सहकार्य मिळाले तर हे प्रकल्प अधिक दर्जेदारपणे सादर करता येतील. यासाठी मला खाली लिहिल्याप्रमाणे सहकार्याची अपेक्षा आहे. १. प्रश्नमंजुषेसाठी जानेवारीच्या पहिल्या आठवड्यात एक धागा लिहिणार आहे.त्यात माझे प्रश्न असतीलच.त्याचबरोबर आपलेही काही प्रश्न काढल्यास ते जरूर पोस्ट करावेत. २. पडघम-२०१४ ही लेखमाला म्हणजे बऱ्यापैकी मोठा प्रकल्प असणार आहे.त्यासाठी जुन्या निवडणुकांची आकडेवारी एक्सेल शीटमध्ये आणणे गरजेचे आहे.मी १९९१ पासून २००९ पर्यंतच्या प्रत्येक लोकसभा निवडणुकांची (१९९९,२००४ आणि २००९ च्या लोकसभा निवडणुकांमधील विधानसभा मतदारसंघनिहाय) आकडेवारी एकत्र केली आहे.तसेच २००१ ते २०१२ पर्यंतच्या प्रत्येक विधानसभा निवडणुकीची (उत्तर-पूर्वेतील लहान राज्ये वगळता) आकडेवारी एकत्र केली आहे. २००० सालच्या ओरिसा विधानसभा निवडणुकीचे काम जवळपास पूर्ण झाले आहे. खरोखर चांगले विश्लेषण करायचे असेल तर जमल्यास १९७७ पासूनच्या लोकसभा आणि १९८५/१९९० पासूनच्या विधानसभा निवडणुकांची आकडेवारी एक्सेलमध्ये आल्यास ते चांगले होईल.मी ते काम करतच आहे.पण माझ्या एकट्याकडून हे काम पूर्ण होईल असे वाटत नाही.तेव्हा या कॉपी-पेस्ट कामात कोणा मिपाकराचे सहकार्य मिळाले तर ते खूप चांगले होईल.हे काम बऱ्यापैकी वेळखाऊ आहे आणि मी बरेच तास यासाठी खर्च केले आहेत.त्यामुळे इतर मिपाकरांकडून काही राज्यांची आकडेवारी मिळाल्यासच मी माझ्याकडील आकडेवारी त्यांच्याबरोबर शेअर करू शकेन.एका निवडणुकीची आकडेवारी एकत्र करून दिल्यास मी २ किंवा ३ निवडणुकांची आकडेवारी देऊ शकेन आणि तेवढे काम करायला लागणारा वेळ द्यायची कोणाची तयारी असेल तर माझ्याकडील सगळी आकडेवारी द्यायलाही माझी ना नाही.पण त्यासाठी बऱ्यापैकी योगदान दिले गेले पाहिजे ही अपेक्षा. सध्या महाराष्ट्र १९९९ आणि १९९५ च्या विधानसभा निवडणुका, बिहार १९९५, आंध्र प्रदेश १९९९, पश्चिम बंगाल १९९६ आणि १९९१ विधानसभा अशा प्रकारच्या आकडेवारीची सध्या कमी आहे. या कामात कोणा मिपाकराचे योगदान द्यायची तयारी असल्यास व्य.नि वर जरूर कळवावे ही विनंती. लेखमाला साधारणत: २६ जानेवारीच्या आसपास सुरू करायची आहे. तोपर्यंत जितकी आकडेवारी जमेल तितक्या आकड्यांचे विश्लेषण करून लेखमाला सुरू करायचा इरादा आहे. धन्यवाद