मिपाकर सभ्य स्त्रीपुरुषहो, राम राम! परवाच मिपावर झानटामाटिक ब्रेडची पाकृ एका मिपाकराने दिली होती. त्यातला 'झानटामाटिक' हा शब्द मला इतका प्रचंड आवडला होता की आपण स्वत:ही एकदा घरी ही झानटामाटिक ब्रेडची पाकृ करायची असं मी ठरवलं होतं. त्याप्रमाणे आज आम्ही इथे सौताच्या हाताने केलेल्या झानटामाटिक ब्रेडची पाकृ व फोटू देत आहोत. आपल्याला तो फोटू आवडेल अशी आशा आहे! :) पाकृ एकदम सोप्पी. ब्रेड चांगला कुस्करून घ्यायचा आणि नंतर फोडणी करून त्यावर छान परतून घ्यायचा. चवीप्रमाणे तिखट-मीठ घालायचं, चिमुटभर साखर घालायची! झाला तिच्यायला झानटामाटिक बिरेड तैय्यार! हाय काय अन् नाय काय! :) तशी ही पाकृ वास्तविक अगदी लहानपणापासून आम्ही खात आलेलो आहोत. आमच्याकडे याला 'फोडणीचा पाव' असा चक्क मराठमोळा मध्यमवर्गीय घरगुती शब्द आहे. पण काय पण म्हणा मंडळी, याच फोडणीच्या पावाकरता 'झानटामाटिक ब्रेड' हा शब्द ऐकल्यापासून हा फोडणीचा पाव उगाचंच गिरगावातल्या गोरेगावकर चाळीतल्या कुणा शित्र्यांच्या की जोश्यांच्या घरातून उठला आणि डायरेक्ट नेपियन सी रोडवरच्या एखाद्या हायफाय, झानटामाटिक घरात जाऊन बसला असं वाटायला लागलं आहे. खरं सांगतो मंडळी, 'झानटामाटिक' हे नांव इतकं छान आहे की या फोडणीच्या पावाचं झानटामाटिक हे नामकरण झाल्यापासून मला तो अधिक आवडूही लागला आहे! :) 'नावात काय आहे?' असं ज्यानं कुणी म्हटलं आहे त्यानं जर लहानपणापासून खात असलेला फोडणीचा पाव हा 'झानटामाटिक ब्रेड' या नावाने खाल्ला असता तर त्यानेसुद्धा 'नांवात काय आहे?' असं म्हटलं नसतं! :) असो... तर मंडळी, हा घ्या आम्ही केलेला झानटामाटिक ब्रेड आणि हादडा! :) आपला, (झानटामाटिक) तात्या.