वाळूचा पाऊस

वाळूचे वादळ हा खरंच भयानक प्रकार असतो. अगदी पुळणीसारख्या बारीक ते गोट्यांएवढ्या मोठ्या वालुकणांचा (गारांसारखा) सपाटून मारा चालू असतो. असल्या मोठ्या वादळात चारचाकी अडकली म्हणजे तिचे केवळ भंगारात रुपांतर होते. गाड्या पाईल-अप होतात त्याचे कमी दिसणे हे जेवढे कारण असते तेवढेच (किंवा किंचीत जास्तच) पुळणीसारखी अतीबारीक कोरडी वाळू रस्त्यावर पसरणे हेही असते... ही वाळू अगदी चिकणमातीच्या चिखलाइतकी निसरडी असते.

तो आहे एक अनामिक सिंदबाद... जो वाळूच्या वादळाला "तोंड" द्यायला आणि मग त्या तोंडाचे लोकांना फोटो काढून द्यायला घाबरला नव्हता !

वातावरण धुसर करण्या इतकी वाळू हवेत पसरवून देण्याएवढी मोठी वादळे सतत होत असतात... वर्षातून १५-२० वेळा तरी. चित्रातल्या प्रमाणे मोठे वादळ वर्षा दोन वर्षातून एकाद्या किंवा कमी वेळा होते. वादळाची काहिशी पूर्वसूचना सॅटेलाईट पिक्चरवरून मिळू शकते पण त्याच्या ताकदीचा अंदाज घेणे कठीण असते. वादळाचा परिणाम म्हणजे वातावरणाचे प्रदुषण वाढते आणि श्वसनाचे विकार असणार्‍या लोकांना फार काळजी घ्यावी लागते... शक्यतो बाहेर जाणे टाळणे अथवा जरूर असल्यास मास्क घालून जाणे वगैरे. पण एक बरे आहे की वार्‍याचा वेग कमी झाला की वाळू पटकन खाली बसते... मात्र हे कधी कधी दिवस दोन दिवस होत नाही.

दुसर्‍या फोटोतली त्रिकोणी भोकवाली इमारत ३०२ मिटर उंच आहे... यावरून त्या उडालेल्या वाळूच्या ऊंचीचा आणि वादळाच्या आवाक्याचा अंदाज बांधता येईल !

श्वसनाचा त्रास असलेला किंवा धुळीची अ‍ॅलर्जी असलेला एखादा अशा वादळात सापडला तर? तर त्याचे नशीब फार खराब असे हे नक्की ! अश्या माणसाने गाडीच्या काचा घट्ट बंद करून बसावे आणि मास्क व आपली औषधे बरोबर घेऊनच नेहमी प्रवास करावा हे उत्तम.