कैरी केशर सरबत

साहित्यः

कच्च्या (व शक्यतो आंबट) कैर्‍या - चार ते पाच साखर - अर्धा किलो (साखरेचे नक्की प्रमाण पाककृती करताना स्पष्ट होईलच) वेलदोडा पावडर - १ चमचा प्रिझर्वेटीव्ह - आवश्यकतेनुसार केशर - चवीप्रमाणे

पाककृती:

१) सर्वप्रथम कैर्‍या स्वच्छ धुवून व स्किन करून घ्याव्यात.

२) स्किन केलेल्या कैर्‍या खिसून घ्याव्यात. कैर्‍या खिसताना कोयीचा / बाठीचा कोणताही भाग खिसला जाणार नाही याची काळजी घ्यावी. कोय खिसली जावून कैरीच्या गरामध्ये मिसळली गेल्यास चवीत फरक पडतो.

३) कैरीचा खिसलेला गर हाताने घट्ट पिळून त्याचा रस काढावा व तो रस गाळण्याने गाळून घ्यावा.

४) एक वाटी रसाला दोन वाट्या साखर या प्रमाणामध्ये साखरेचा पक्का पाक तयार करावा.

५) साखरेचा पाक गरम असतानाच त्यामध्ये केशर व वेलदोडा पूड मिसळावी व लगेचच एकत्र करावे.

६) वरील मिश्रण संपूर्णपणे थंड झाले की त्यामध्ये कैरीचा रस मिसळावा व पुन्हा एकत्र करावा.

७) सरबत तयार आहे. चवीप्रमाणे थंड पाण्यात मिसळून आस्वाद घ्यावा!

******** अधिक माहिती ******** १) कैर्‍या शक्यतो आंबट असाव्यात. २) सरबतामध्ये आवश्यक असल्यास सर्वात शेवटी प्रिझर्वेटीव्ह मिसळावे. ३) आमच्याकडे हे सरबत "वार्षिक व टिकाऊ खाद्यपदार्थांच्या गटात" येत असल्याने एप्रिल / मे महिन्यात एकदम तयार केले जाते. तसेच मागच्या वर्षी केलेले सरबत या वर्षी वापरात आणले जाते. वर्षभरात केशर आणि वेलदोडा मुरल्यामुळे अफलातून रंग व चव येते. ***********************डिस्क्लेमर*********************** सदर पाककृतीचे संपूर्ण श्रेय मातोश्रींना. मी फक्त क्लिकक्लिकाट करून येथे अपलोडवले. ;-) ****************************************************

वाचने 21232

प्रतिक्रिया 42

प्रतिक्रिया

होतकरु उमेदवाराची छान पाककृती

प्यारे१ गुरुवार, 23/05/2013 21:41

होतकरु उमेदवाराची छान पाककृती. :) आवडली. सरबत देण्याघेण्याचा मौसम सुरु झाला तर. ;)

छान आहे हो

सस्नेह गुरुवार, 23/05/2013 21:48

सरबत. मस्त कलर आलाय. आईने केले की ताईने ?

गल्ली चुकलास काय विचारणार होतो.

सूड गुरुवार, 23/05/2013 21:51

डिस्क्लेमर वाचून प्रश्न मागे घेण्यात आला आहे.

+१

लाल टोपी गुरुवार, 23/05/2013 22:52

हेच म्हणतो

+२

लॉरी टांगटूंगकर शुक्रवार, 24/05/2013 09:33

अग्दी हेच म्हणतो

लग्नाळू झाल्याची झायरात आवडली

रेवती गुरुवार, 23/05/2013 22:39

लग्नाळू झाल्याची झायरात आवडली कार्यक्रम ठरलेले दिसतायत. ;) सरबताचा रंग झकास आलाय. चव घेण्यास नंतर येऊ.पहिला फोटू मस्त. डिस्क्लेमर टाकला नसता तरी चालले असते, आम्ही समजून घेतो.

रोचक पाकृ

श्रीरंग_जोशी गुरुवार, 23/05/2013 22:48

अरे वा केसर अन कैरी, रोचक पाकृचे उत्तम सादरीकरण. केशर Trader Joe's असल्याने अमेरिकेतून आयात केल्याचे दिसत आहे. देवा काय दिवस आले रे.... ;-).

फोटो मस्त!

पैसा गुरुवार, 23/05/2013 23:15

काहीतरी खवचट बोलणार होते, पण आईने दिलेली पाकृ आहे म्हटल्यावर काही शंका नाहीत! प्यायला कधी येऊ? कांदेपोहे करायला शिकलास का?

प्रतिक्रियेबद्दल धन्यवाद.

मोदक गुरुवार, 23/05/2013 23:41

प्रतिक्रियेबद्दल धन्यवाद. मराठी संस्थळावर प्रस्थापितांकडून नवलेखकांवर होणारा अन्याय पाहून भरून आले. :'(

कोण म्हणे नवलेखक? तू? हॅ हॅ

रेवती गुरुवार, 23/05/2013 23:52

कोण म्हणे नवलेखक? तू? हॅ हॅ हॅ.

ते सगळं राहू दे

पैसा शुक्रवार, 24/05/2013 08:07

कांदेपोहे करायला शिकलास का, या मुदलाच्या प्रश्नाला सोयिस्कर बगल देण्यात आलेली आहे. :[

होय होय, हल्ली ब-याच

५० फक्त शनिवार, 25/05/2013 00:16

होय होय, हल्ली ब-याच मुद्द्याच्या प्रश्नांना बगल कशी द्यायची याचं ट्रेनिंग चालु आहे,लग्नाच्या बाजारात उभं राहुन सुखी नवरा होण्यासाठी लागणारा हा एक महत्वाचा गुण आहे,

सौ

रामदास रविवार, 26/05/2013 18:00

कांदेपोहे खाके बोका चला ....असे म्हणायचे का ?

हाहाहा!

पैसा रविवार, 26/05/2013 19:29

पण मग त्याची यात्रा मांडवात संपेल!

अप्रतिम.

प्रभाकर पेठकर शुक्रवार, 24/05/2013 03:32

ह्यालाच कैरीच्या कोळाचे, साखर + केशर घातलेले, पन्हे असेही म्हणतात. रंग भन्नाट आहेच, चव सुद्धा अप्रतिम असणार ह्यात शंका नाही.

पन्ह्यात कैरीचा गर शिजवून

इनिगोय शुक्रवार, 24/05/2013 12:37

पन्ह्यात कैरीचा गर शिजवून घेतात ना? कैरीचा नुसता रस वापरल्याने हे चवीला पन्ह्यापेक्षा वेगळं लागेल.

बरोबर आहे

पैसा शुक्रवार, 24/05/2013 13:40

आणि मला आठवतंय, माझी आई असं टिकाऊ पन्हं करायची ते कैर्‍या शिजवूनच करायची. त्यात इतर कसलं प्रिझर्व्हेटिव्ह घालत नव्हती ती.

पन्हे वेगळे.. सरबत वेगळे.

मोदक शनिवार, 25/05/2013 17:19

पन्हे वेगळे.. सरबत वेगळे. ;-) या सरबतामध्ये प्रिझर्व्हेटिव्ह घालायचे कारण ते पुढे वर्षभर टिकवायचे असते. अगदी महिन्याभरात सरबत संपणार असेल तर प्रिझर्व्हेटिव्ह ची गरज नाही!

हेही पन्हे आणि तेही पन्हे.

प्रभाकर पेठकर रविवार, 26/05/2013 14:05

माझ्या मते हे दोन्ही पन्ह्याचेच प्रकार आहेत. कैर्‍या उकडून त्यांच्या गरात गुळ आणि वेलची घालून करतात ते पन्हे जास्त प्रसिद्ध आणि महाराष्ट्रात केले जाते. उत्तरेकडे हेच पन्हे कैर्‍या किसून त्यात साखर आणि केशर घालून करतात. (हल्ली महाराष्ट्रातही केले आणि विकले जाते.) सरबत म्हंटले तरी कांही हरकत नाही. चवीला दोन्ही वेगवेगळी पण ब्येष्ट लागतात.

आपल्या माऊलीच्या जिवावर

यशोधरा शुक्रवार, 24/05/2013 05:27

आपल्या माऊलीच्या जिवावर मोदकाप्पा उदार! :D

मस्त रे.

प्रचेतस शुक्रवार, 24/05/2013 09:03

मस्त रे. बाकी उच्च दर्जाचे काश्मिरी केशर उपलब्ध असताना स्पॅनिश का म्हणून वापरलेस?

कोण मोदक राव?

स्पंदना शुक्रवार, 24/05/2013 09:03

कोण मोदक राव? डोंगरावर चढायच सोडुन इकडे कुठे? डायरेक्ट पाककृती? फिरले रे देवा फिरले, सारे सारे ग्रह फिरले. एकुण किती माणस पिउन गेली म्हणे हे सरबत? कुणाकुणाला आवडल म्हणे ते? अन तुम्हाला कोण कोण आवडल? आमच्या मोदकान केलय हं ! अस बीस कुणी म्हंटल की नाही? बाकि आईंना सांगा झकास झालय. आवडल. वर्षभर टिकतय म्हणजे दिवाळीच्या मोसमाला पण चालुन जाईल अशी अपेक्षा.

अहो एवढे दिवस तिकडं चिंचवडात

५० फक्त शनिवार, 25/05/2013 00:19

अहो एवढे दिवस तिकडं चिंचवडात राहात होता, तिथुन सिंहगड पार लांब, तोवर होतं डोंगराचं कौतुक, आता त्याचं घरच निम्म्या डोंगरात आहे, गच्चीवर गेल्यावर सिंहगडाच्या बाबुच्या घरात पिठल्याला फोडणी दिल्याचा धुर दिसतो, मग आता कशाला आलंय कौतुक डोंगरा बिंगराचं, असंही ट्रेकिंग करावं वाटलं की वडगावच्या पुलावरुन खाली उतरायचं आणि अर्धवट प्ल्यायओव्हरच्या रगाड्यातुन चालत चालत मोदकच्या घरी जाईपर्यंत मोद्काच्या सगळ्या पाकळ्या खुललेल्या असतात.