Skip to main content

चिकन रोगनजोश

लेखक खादाड अमिता यांनी बुधवार, 08/05/2013 13:58 या दिवशी प्रकाशित केले.
chicken roganjosh चिकन रोगनजोश सामग्री: १/२ किलो चिकन १ छोटा चमचा लसूण पेस्ट ३ मोठे चमचे दही १ छोटा चमचा धने-जिरे पूड २ मोठे चमचे काश्मिरी लाल मिरची पूड मीठ चवीनुसार मसाला: १ कांदा ८ लसूण पाकळ्या १ सुकी लाल मिरची (कांदा, लसुन आणि मिरची ची पेस्ट करून घ्यावी) १ मोठा चमचा तेल १ छोटा चमचा धने-जिरे पूड १ छोटा चमचा बडीशेप पूड १ छोटा चमचा गरम मसाला पावडर १ मोठा चमचा काश्मिरी लाल मिरची पूड अख्खा मसाला - १ छोटा चमचा जिरे १ छोटा चमचा काळी मिरी १ छोटा चमचा लवंग १ इंच दालचिनी चा तुकडा ३ हिरवी वेलची १ तेज पत्ता कृती: - चिकन ला दही, लसुन पेस्ट, धने जिरे पूड, मिरची पावडर आणि मीठ चांगले चोळून, अर्धा तास फ्रीज मध्ये मुरत थेववे. - एका भांड्यात तेल गरम करून त्यात चिकन लालसर होई पर्यंत परतून घ्यावे. चिकन दुसऱ्या भांड्यात काढून ठेवून, उरलेल्या तेलात अक्खा (खडा ) मसाला थोडा परतून घ्यावा. मग त्यात कांदा लसुन पेस्ट परतावी आणि त्यावर बाकी मसाले पूड घालावे. - सर्व मसाल्याला तेल सुटलं कि मग त्यात चिकन आणि १ वाटी पाणी घालून, झाकण ठेवून मध्यम आचेवर शिजवावे. गरज वाटल्यास थोडं अजून पाणी घालावे. - तुमच्या आवडीनुसार, रस्सा दाट किंवा पातळ ठेवू शक्ता. - गरम गरम नान, फुलके किंवा पूलाव सोबत फस्त करावे!
वाचने 29884
प्रतिक्रिया 19

प्रतिक्रिया

विसोबा खेचर बुधवार, 08/05/2013 14:12
वा...!

प्रभाकर पेठकर बुधवार, 08/05/2013 15:46
मुळात 'रोगनजोश' म्हंटल्यावर पदार्थावर 'रोगन' (तर्री) अपेक्षित आहे. 'रोगन' विरहीत 'रोगनजोश' होऊ शकत नाही. मुळात 'मटण रोगनजोश' ही एक काश्मिरी पाककृती आहे. त्याला आपल्या आवडीनुसार चिकन रोगनजोश बनविण्यास काहीच हरकत नाही. पण, 'रोगन' महत्त्वाचे. ह्या पाककृतीचा तो प्राणच म्हणावयास हरकत नाही. पाककृती चवीला चांगली असणार ह्यात वाद नाही. करून पाहिली जाईलच. पण एखादे दुसरे नांव शोधावे लागेल.

बॅटमॅन बुधवार, 08/05/2013 18:45
रोगन म्हंजे तर्री होय? तरी म्हटलं असं रोगट नाव का आहे या पाकृचं. आज कळ्ळं काय भानगड आहे ते, बहुत धन्यवाद पेठकरकाका :)

कपिलमुनी गुरुवार, 09/05/2013 00:13
काका, तुमच्या हाताचा फर्मास मटण रोगनजोश येउ द्या

प्यारे१ मंगळवार, 14/05/2013 20:07
>>>कोपर्‍यातून डोकावणार्‍या पोळ्या/ फुलके अधिक छान दिसतायेत. खरंय रे बाबा! - आता इकडे पोळ्या करणारी शोधणं आलं. ;)

jaypal बुधवार, 08/05/2013 18:38
पेठकर काकांशी सहमत अवांतर >>>१ सुकी लाल मिरची (कांदा, लसुन आणि मिरची ची पेस्ट करून घ्यावी) कांदा कच्चाच घ्यावा की परतुन्/भाजुन घ्यावा?

डॉ सुहास म्हात्रे बुधवार, 08/05/2013 18:40
गरम गरम नान, फुलके किंवा पूलाव सोबत फस्त करावे! फोटो पाहून तुमचा आदेश पाळण्याची अतीव इच्छा झाली आहे... फक्त ते कुठे ठेवलय ते सांगा. बाकी आम्ही बघून घेउ.

गवि गुरुवार, 09/05/2013 11:17
स्टेप बाय स्टेप, किमान महत्वाच्या स्टेप्सचे फोटो पाकृमधे नेहमी असावेत असं मला वाटतं. त्यामुळे पाककृती प्रत्यक्ष करताना वेळोवेळी आपण योग्य ट्रॅकवर आहोत ना याची खात्री करता येते. (रंग, कन्सिस्टन्सी, क्वांटिटी वगैरे अनेक बाबतीत.)

साती मंगळवार, 14/05/2013 19:57
आत्तापर्यंत पाहिलेल्या रोगनजोशपेक्ष वेगळीच दिसतेय. पण यम्मी दिसतेय. मी एका ऑथेंटिक रेसिपीत रोगनजोशमध्ये चक्क कोकम घातलेले पाहिलेय. कोंकणातलं कोकम कश्मिरी वाझवानमध्ये पाहून विस्मय वाटले होते.