माझे Chrome extension: 1toN tabs

ह्याची कल्पना सुचायचे श्रेय जाते ते माझ्या आळशीपणाला. मी विविध फोरम्स वर बरेच वाचन करत असतो, आणि त्यातील बर्‍याचशा फोरम्स वर प्रतिसादांची ५० एक पाने असतात. एका पानावरील प्रतिसाद वाचून संपले की पुढील पानावर जाण्यासाठी Next अथवा त्या छोट्याश्या > चिन्हावर click करण्याचा - खासकरून त्या लॅपटॉप च्या Trackpad वरून - जाम वैताग यायचा. ह्याला उपाय म्हणून मी मग साधारणपणे २,३,४… अशा पान क्रमांकावर Ctrl + Click करून ती नवीन टॅब्स मधे उघडून ठेवत असे आणि मग पान वाचून संपले की Ctrl +W ने बंद करत असे. पण बहुतांश साईट केवळ पुढची ५ एक पानांच्याच लिंक्स दाखवतात. त्यामुळे ५ पाने वाचून संपली की मग येरे माझ्या मागल्या. म्हणून विचार केला की समजा असे काही बनवता आले की ज्यात नंबर टाकून पुढील ३० एक पाने उघडून ठेवता आली तर? बहुतांश फोरम्स ड्रुपल अथवा तत्सम प्रणालीवर चालत असल्याने page अथवा p असे काहीतरी त्यांच्या पत्त्यामधे असते ज्याला URL parameterम्हणतात. हा URL Parameter कोणते पान दाखवायचे ते सर्वरला सांगतो. मग हा URL parameter बनवायचा कोड लिहीला जेणेकरून हे सगळे नवीन टॅब एका click मधेच उघडता येतील आणि मग हे extension तयार झाले. उदा. खालील screen shot बघा. टिचकी मारल्यास मोठे चित्र दिसेल.

From mipa

ह्याच्या काही मर्यादा.

• हे फक्त गूगल च्या क्रोम या ब्राउजर वरच चालते. वेळ मिळाला की फायरफॉक्ससाठीही लिहीण्याचा विचार आहे.
• हे फक्त अशाच फोरम्स वर चालते जिथे पान क्रमांक तुम्हाला address bar मध्ये page=2 अशा स्वरूपात दिसतो.
• बर्‍याच साईट्सवर पहिल्या पानावर हा क्रमांक URL मध्ये दिसत नाही त्यामुळे तुम्ही नवीन साईट वर गेलात जिथे तुम्हाला नक्की URL parameter माहिती नाही तिथे तुम्हाला दुसऱ्या पानावर जाउन नक्की URL parameter माहित करून घ्यावा लागेल. तुम्हाला जर आधीपासून हा parameter माहित असेल तर तो parameter name च्या text box मध्ये टाकून तुम्हाला पुढील पाने उघडता येतील.

हे extension Chrome Web Store मधून या दुव्यावरून उतरवून घेता येईल.