Skip to main content

रेशिमगाठी

लेखक क्रान्ति यांनी मंगळवार, 26/02/2013 16:08 या दिवशी प्रकाशित केले.
ती व्याकुळ होउन गाते भावार्त, निरागस गाणी तरुण व्यथांची अन् मनस्मरणीवर जपते विस्मरली नावे विरलेल्या शपथांची ती केविलवाणे हसते भरल्या डोळ्यांच्या रित्या करून पखाली दंव जसे फिकटते, विरते सुकतात आसवे तशीच थबकुन गाली ती अलिप्त होउन लिहिते कधि तिचीच असुनी नसते अशी कहाणी वाचून मनाशी म्हणते 'इतकी अगतिक का असते कुणी दिवाणी?' भिरभिरत एकटी फिरते भंगून विखुरल्या स्वप्नांच्या वाटांनी फिरफिरुन रोज सावरते घरकूल कैकदा विस्कटले लाटांनी मुखवटे कितीक घडविते लावून वर्ख ती फसव्या हास्यासाठी हट्टाने बांधत बसते तुटल्या नात्यांच्या सुटल्या रेशिमगाठी
लेखनविषय:
वाचने 3357
प्रतिक्रिया 16

प्रतिक्रिया

मिसळलेला काव्यप्रेमी मंगळवार, 26/02/2013 16:28
मुखवटे कितीक घडविते लावून वर्ख ती फसव्या हास्यासाठी हट्टाने बांधत बसते तुटल्या नात्यांच्या सुटल्या रेशिमगाठी
मस्त!! तुफान!!! भन्नाट !!!!

इन्दुसुता बुधवार, 27/02/2013 08:03
ती अलिप्त होउन लिहिते
आजकाल तिने लिहीणेही सोडून दिले आहे.
हट्टाने बांधत बसते तुटल्या नात्यांच्या सुटल्या रेशिमगाठी
त्या अश्या बांधल्या जात नाहीत हे तिला कसे आणि कधी समजणार, कोण समजवणार? ती एकदा दिसली मजला आरश्यात पाहता पाहता मी ओळखले तिजला नाही आसवात हरवून जाता कवितेवर प्रतिसाद देण्यासाठी जीव थार्‍यावर नाही. या निमित्ताने नानांची एक जुनी कविता आठवली " हे अताशा मला काय होते" असे काहीसे शीर्षक होते....

जेनी... गुरुवार, 28/02/2013 01:16
क्रांती ... तु खरच शतजन्मी मीरा ! मी तुझ्या दोन कविता आईला वाचुन दाखवल्या . जस्ट फक्त इमॅजिन कर किती कौतुकाने ऐकत होती ती .. खुप छान वाटलं मला .. थॅंक्स डीअर .

अभ्या.. गुरुवार, 28/02/2013 01:40
अगदी सहमत. मिका आणि क्रांतीतैंच्या कविता खरेच फार आवडतात मला आणि सार्‍यांनाच

शैलेन्द्र गुरुवार, 28/02/2013 17:21
मुखवटे कितीक घडविते लावून वर्ख ती फसव्या हास्यासाठी हट्टाने बांधत बसते तुटल्या नात्यांच्या सुटल्या रेशिमगाठी
काळजावर रेघ उमटावी असे शब्द .. सलाम..