Skip to main content

आयुष्य राजयोगी (तरही गझल)

लेखक जयवी यांनी मंगळवार, 12/02/2013 11:57 या दिवशी प्रकाशित केले.

आयुष्य राजयोगी,उपभोगता न आले
माझे असून “माझे” संबोधता न आले

आभाळ पापण्यांना सांभाळता न आले
मज दोन आसवांना हुलकावता न आले

राशी अनेक होत्या गाठीस पातकांच्या
गंगेस पाप सारे स्वीकारता न आले

बरसात तू सुखाची, केली सदैव देवा
झोळीच फाटकी मज सुख झेलता न आले

जखमा असंख्य होत्या अन्‌ वेदना पुरेशा
वणव्यास का मनाच्या सुलगावता न आले

सोडून दूर सुख मी दु:खात चूर झाले
दु:खातल्या सुखाचे "सुख" टाळता न आले

जयवी - जयश्री अंबासकर

काव्यरस
अभय-गझल
लेखनविषय:
वाचने 2750
प्रतिक्रिया 11

प्रतिक्रिया

जयवी मंगळवार, 12/02/2013 15:18

तरही गझल म्हणजे एक कुठला तरी मिसरा कुणाच्या तरी गझलेतला घेऊन लिहीलेली गझल.
ह्यात "मज दोन आसवांना हुलकावता न आले" हा मिसरा सुरेश भटांचा आहे.

मिसळलेला काव्यप्रेमी मंगळवार, 12/02/2013 16:54

सुरेख रचना:

जखमा असंख्य होत्या अन्‌ वेदना पुरेशा
वणव्यास का मनाच्या सुलगावता न आले

व्वाह!

अग्निकोल्हा मंगळवार, 12/02/2013 17:02

राशी अनेक होत्या गाठीस पातकांच्या
गंगेस पाप सारे स्वीकारता न आले

ही ओळ मस्तच वाटली.

प्रसाद१९७१ शुक्रवार, 15/02/2013 17:40

लावुनी आग मनाला, सोडुनी गेलीस तू
अश्रुंचा पूर वाहिला, विझवता ने आले |

दिल्यास संधी तू अनेक झेल घेण्याच्या
गळकेच हात माझे, कॅच झेलता न आले | :-)

ह्या मर्त्य ललना की अप्सरा स्वर्गातल्या
बायको साथीला, भरुनी डोळे बघता न आले. | :-)