गाजराचं रसरशीत लोणचं

माझ्या आईची ही रेसिपी. एकदम सोप्पी आणि हमखास सुपर डुपर हिट होणारी आहे. साहित्य : मस्त लाल गाजरं - ५-६ लसूण पाकळ्या ५-६ मीठ चवीप्रमाणे गूळ - चवीप्रमाणे लिंबाचा रस - चवीप्रमाणे केप्र कैरी लोणचं मसाला - ४ टॅबल स्पून फोडणीसाठी तेल - चांगलं वाटीभर मोहरी हिंग कृती: १. गाजरं अगदी बारीक चिरुन घ्यायची. हे सगळ्यात महत्वाचं ! गाजरं जितकी बारीक आणि एकसारखी चिरल्या जातील तितकं लोणचं छान लागतं आणि दिसतं. २. लसूण पाकळ्या सुद्धा बारीक चिरुन घ्या. ३. त्यात मीठ, लिंबाचा रस, गूळ आणि लोणच्याचा मसाला घालून मस्तपैकी मिसळायचं. ४. फोडणी तयार करुन त्यात मोहरी आणि हिंग घालून ते तेल गरमच ह्या मिश्रणावर घालायचं आणि मिसळायचं. एकदम रसरशीत गाजराचं लोणचं तय्यार लोणच्यासारखं खाल्लं तर १०-१५ जण खाऊ शकतात ;) अधिक टिपा: फोडणी घालायच्या आधी सगळं मिश्रण चमच्याने नाही तर हाताने कालवायचं. म्हणजे मस्त छान पाणी सुटतं आणि सगळा मसाला व्यवस्थित लागतो. ह्यात जर पातीचा लसूण मिळाला तर बेस्ट. आपली नेहेमीची गाजरं मिळाली तर उत्तम पण केशरी गाजराचं लोणचं सुद्धा झकास लागतं. गाजरं चिरायच्या ऐवजी किसायची मात्र नाही....मज्जा येत नाही !! थोडी मेहेनत करुन बारीक चिरुनच करायचं लोणचं.