सांग सखया.........

चालताना तू थोडा थबकलास
नुसताच थबकलास का
दूरवर सोबत करण्याचा
विचार तुझा बदललास?

हाक मारताना तू अडखळलास
नुसताच अडखळलास की
ओठात माझेच नाव असण्याचा
तुझा रिवाज तू बदललास?

बोलताना तू जरासा थांबलास
नुसताच थांबलास की
माझ्यापाशीच मन मोकळे करण्याचा
तुझा हक्कच तू विसरलास?

निरोपाच्या क्षणी तू आवंढा गिळलास
नुसताच आवंढा गिळलास की
आयुष्यातून मला वजा करताना
स्वत:लाच भागून मोकळा झालास?

खरं सांग, सारे काही विसरलास? सारे काही संपले?
खरच संपलय कि
आजही प्रीतीचे नाव घेता
तुझे जग सारे माझ्याशीच येऊन थांबलंय