कारळ्याची चटणी

साहित्यः १ वाटी कारळे ३/४ वाटी कढीपत्ता ४-५ लाल सुक्या मिरच्या (आवडीप्रमाणी कमी जास्त) १/४ वाटी तीळ १/२ वाटी भाजलेले शेंगदाणे १/४ वाटी सुके खोबरे मीठ चवीनुसार १/२ टीस्पून हींग पाकृ: एका पॅनमध्ये कारळे कोरडेच भाजून घ्यावे व एका ताटात काढून घ्यावे. त्याच पॅनमध्ये कोरडेच तीळ गुलाबी रंगावर भाजून घ्यावे व ताटात काढून घ्यावे. त्याच पॅनमध्ये एक टेबलस्पून तेल गरम करून कढीपत्ता तळून घ्यावा. तो कुरकूरीत झाला की काढून ठेवावा. त्याच पॅनमध्ये मिरच्या तळून घ्याव्यात. त्याही बाजूला काढून ठेवाव्यात. आता पॅनमध्ये हींग व सुके खोबरे सोनेरी रंगावर परतून घेणे. सगळे थंड झाली की मिक्सरच्या भांड्यात एकत्र करावे. त्यात भाजलेले शेंगदाणे व मीठ घालून वाटून घ्यावे. कारळ्याची खमंग चटणी तयार आहे. हवाबंद डब्यात भरुन ठेवावी.