लसुनी मश्रुम आणि बेबी कॉर्न.

साहित्यः बटण मश्रूम १०-१२ नग बेबी कॉर्न १०-१२ नग तेल २ ते ३ मोठे चमचे (टेबल स्पून) लसूण २ ते ३ मोठे चमचे कांदा १ मोठा टोमॅटो १ मध्यम हळद १/२ लहान चमचा ( टी स्पून) तिखट १/२ लहान चमचा गरम मसाला १/२ लहान चमचा मीठ चवीनुसार कोथिंबीर मुठभर तयारी: मश्रूमचे चार चार तुकडे करून घ्या. बेबी कॉर्नचे (तिरपे) तुकडे करून घ्या. २ ते ३ मोठे चमचे होतील एवढा लसूण बारीक चिरुन घ्या. कांदा बारीक चिरुन घ्या. टोमॅटो मिक्सर मधून फिरवून त्याची प्यूरे करून घ्या. कोथिंबीर बारीक चिरुन घ्या. कृती: एखाद्या छोट्या कढईत अथवा फ्राय पॅन मध्ये तेल गरम करा. तेल चांगले तापले की त्यात बारीक चिरलेला लसूण टाकून मध्यम आंचेवर लाल होई पर्यंत परतुन घ्या. लसूण लाल झाला की त्यावर बारीक चिरलेला कांदा लाल होईस्तोवर परतुन घ्या. कांदा नीट परतला गेला की त्यावर ३ मोठे चमचे टोमॅटो प्यूरे टाकून परता. त्यावर मीठ, हळद, तिखट, गरम मसाला टाकून परतत राहा. आता त्यावर मश्रूम टाकून परता. मश्रूम मध्ये पाण्याचा अंश जास्त असतो त्यामुळे पाणी टाकताना सांभाळून. आपल्याला रस्सा भाजी करायची नसून अंगचाच मसाला असला पाहिजे. थोड्यावेळाने मश्रूमला पाणी सुटेल. गरज भासल्यास अगदी १-२ मोठे चमचे (टेबलस्पून) पाणी टाकून परतत राहा. मश्रूम जसे शिजत जातील तसे आकाराने जरा लहान होतील. साधारण शिजले की त्यात बेबी कॉर्न आणि, सजावटी साठी थोडी बाजूला ठेवून, कोथिंबीर घाला. मंद आंचेवर शिजवा. गरज भासेल त्या नुसार १-२ चमचे पाणी घाला. बेबी कॉर्न जरा करकरीतच राहू द्या. आता भाजी बाऊल मध्ये काढून उरलेल्या कोथिंबीरीने सजवा. शुभेच्छा...!