कढी-गोळे

गोळ्यांसाठी साहित्यः चणा डाळ १ वाटी आलं १ इंच हिरव्या मिरच्या ३-४ नग हळद १/२ लहान चमचा (टी स्पून) मीठ चवीनुसार खायचा सोडा १/२ लहान चमचा जीरं १ लहान चमचा गोळ्यांची कृती: चणाडाळ ६-७ तास पाण्यात भिजत टाका. नंतर पाणी निथळवून मिक्सरवर, कमीतकमी पाणी वापरून, भरडसर वाटून घ्या. घरात खिम्याचे यंत्र (मिन्सिंग मशीन) असेल तर उत्तम. अजिबात पाणी न घालता त्यातून वाटून घ्या. आलं + हिरव्या + मिरच्या एकदम बारीक चिरून किंवा खलबत्यात कुटून वाटलेल्या डाळीत घाला. हळद, मीठ आणि जीरं घालून हाताने मिसळून एकजीव करून घ्या. गॅस वर इ़डली पात्रामध्ये पाणी उकळत ठेवा. इडलीचे साचे घेऊन त्याला तेलाचा हात लावून घ्या. आता वरील डाळीच्या मिश्रणात सोडा टाकून हाताने मिसळून ह्या मिश्रणाचे लिंबापेक्षा किंचित लहान आकाराचे गोळे करून इडली साच्यात एका साच्यात ३ असे ठेवा. हे साचे कुकर मधील पाणी उकळले की त्यात ठेवा. एक सोडून एक असे कुकरमध्ये ठेवले की ते गोळ्यांना चिकटत नाहीत. वरून झाकण ठेऊन गोळे १५ ते १७ मिनिटे उकडून घ्या. असे करून सर्व गोळे उकडून घ्या आणि कुकरमधून काढून थंड करायला ठेवा. कढी साहित्यः दही २ डाव चण्याचे पिठ २ मोठे चमचे (टेबलस्पून) हळद १ लहान चमचा आलं २ इंच हिरव्या मिरच्या ३ नग मीठ चवीनुसार साजुक तुप २ मोठे चमचे जीरं १ मोठा चमचा कढीलिंब पाने २ डहाळ्या हिंग १/४ लहान चमचा कोथिंबीर सजावटीसाठी. कृती: दही +चण्याचे पिठ + हळद + मीठ एकत्र करून फेटून घ्या. त्यात आलं आणि मिरच्या बारीक चिरून किंवा खलबत्यात ठेचून मिसळा. त्यात पाणी घालून कढी बनवा. आता ही कढी मध्यम आंचेवर उकळायला ठेवा. गॅसवर ठेवल्यावर उकळी येई पर्यंत सतत ढवळत राहा नाहीतर कढी फुटण्याची शक्यता असते. कढी शिजली की त्यात थंड केलेले गोळे घालून पुन्हा एक उकळी काढा. आता गॅस बंद करा. कढल्यात तुप तापवून त्यात जीरं, कढीलिंब आणि हिंग घालून फोडणी करा आणि ती कढीत ओतून लगेच झाकण ठेवा. वाढायच्या वेळेस कोथिंबीरीने सजवा. शुभेच्छा....!