हॉस्टेल पुलाव विथ रायता

काही कामासाठी खरगपुरात असल्याने मित्राच्या खोलीवर राहतोय. या मित्राला मेसचे जेवण अज्जिबात आवडत नाही. (मला खूप आवडते असे नाही, पण सहन तरी करु शकतो, पण ते असो!) आज रविवार असल्याने रुमवरच काहीतरी बनवू असे त्याने आज सकाळी सुचवले. म्हणलं ठिकेय. दुपारी १२च्या सुमारास मित्र भाजी घेऊन आला आणि आमचा स्वयंपाक चालू झाला. मित्र कन्नडिग असल्याने भात ठरलेलाच. (रुमवर इतर काही करण्यासारखेही नव्हते) जिन्नसः तांदूळ, घेवडा, १ गाजर, १ कांदा, गरम मसाला, तेल, जिरे, २ मिरच्या, कोथिंबीर कृती: सर्व भाज्या धुवुन चिरुन घेतल्या. एका कुकरमध्ये धुतलेले तांदूळ घेऊन सर्व भाज्या टाकल्या. कांदा जरा मोठाच चिरला. पाणी, जिरे, तेल, गरम मसाला, मीठ हे सर्व त्यात टाकले. (सर्व अंदाजेच. रुमवर सानिकातैंच्या स्वयंपाकघरात असतात तसे व तेवढे चमचे नाहीत.) प्रेस्टीज हॉटप्लेट ७०० वॅट सेटींगवर लावून कुकर १० मिनिटे ठेवला व रायत्याच्या तयारीला लागलो. रायत्यासाठी हातात होते २ टोमॅटो आणि १ कांदा. कांदा बारीक चिरला. टोमॅटो जसे जमतील तसे चिरले. कोथिंबीर, मिरची चिरली. एका पातेल्यात चिरलेली सामग्री घेतली. अंदाजे मिठ टाकले. दही ओतले. चमच्याने मस्त एकत्र केले. झाला रायता तयार. पत्रावळीवर वाढलेला भात-रायता. सोबत कांदा आणि लोणचे.