आचार्य बाळकृष्ण आणि इतर थोर राष्ट्रपुरुष आता एकाच रांगेत..!

देशाबाहेरील काळा पैसा, भ्रष्टाचार या विषयांकरता बाबा रामदेवांचे आजपासून दिल्लीच्या रामलीला मैदानावर आंदोलन सुरू झाले आहे.. मैदानात ठिकठिकाणी त्या संदर्भातील फलक लागले आहेत. त्यातील एका फलकावर भगवान श्रीकृष्ण, सीतामाई, म. गांधी, सुभाषबाबू, वल्लभभाई पटेल, चंद्रशेखर आझाद, भगतसिंग, शिवछत्रपती या थोर राष्ट्रपुरुषांची चित्रे आणि त्या सर्वांच्या मधोमध थोडे मोठ्या आकाराचे रामदेवबाबांचे चेले असलेले आचार्य बाळकृष्ण यांचेही चित्र असलेला एक फलक लावला आहे.. "वरील सर्व मंडळींसारखेच आचार्य बाळकृष्णही तूर्तास तुरुंगात गेले आहेत, पण तेही इतर सर्व मंडळींप्रमाणेच देशाकरता तुरुंगात गेले आहेत, त्यामुळे देशाकरता तुरुंगात जाणे हे आचार्य बाळकृष्णांकरता भूषणावहच आहे.. " असा काहीसा सूर असलेले निवेदन सदर फलकावर आहे.. हा फलक पाहून आमची खूपच करमणूक झाली.. खोट्या पारपत्राच्या संदर्भात, खोट्या पदव्यांच्या संदर्भात आणि नेपाळी नागरिकत्वाच्या संदर्भात कैदेत असलेले आचार्य बाळकृष्ण हे शिवछत्रपतींच्या रांगेत बसण्याइतकेच थोर आहेत हे आम्हा पामराला माहीत नव्हते..! यातला करमणुकीचा भाग सोडून दिल्यास आमच्या मते सदर फलक हा शिवछत्रपतींसारख्या, भगतसिंगांसारख्या प्रखर राष्ट्रपुरुषांचा धडधडीत अपमान असून हे कृत्य राष्ट्रदोहाच्या शिक्षेस पात्र आहे असे आमचे मत आहे.. या छोटेखानी लेखाद्वारे लोकशाही मार्गाने आम्ही या फलकाचा आणि फलक लावणार्‍यांचा तीव्र निषेध करतो.. -- कॉमॅ.