टोमॅटोचं सार

टोमॅटोचं सार... माझं एकदम फेवरेट आहे. हे गरम गरम भाताबरोबर एकदम सह्ही लागतं. १ नंबर Smile आणि नुसतं खायलाही मस्तच लागतं. करायला पण एकदम सोपं. साहित्यः ४-५ लाल टोमॅटो, ४-५ लसूण पाकळ्या (मोठा लसूण असेल तर २ बास होतील) किसून किंवा पेस्ट करून, १ टीस्पून किसलेल आलं किंवा आलं पेस्ट (लसूण पेस्ट च्या निम्मी आलं पेस्ट घ्या), ३-४ टेबलस्पून खोवलेलं ओलं खोबरं, १ टेबलस्पून बारीक चिरलेली कोथिंबीर, १ टीस्पून जिरे, अर्धा टीस्पून मोहरी, चिमूटभर हिंग, अर्धा टीस्पून हळद, २-३ टेबलस्पून तेल, चवीनुसार तिखट, मीठ, साखर कृती: १. प्रथम टोमॅटो कुकरला लावून शिजवून घ्या. मग टोमॅटोची सालं काढून शिजलेले टोमॅटो मिक्सरमधून फिरवून त्याची प्युरी करून घ्या. २. एका कढईत/पॅनमध्ये तेल घेऊन त्यात जिरे, मोहरी, हिंग, हळद टाकून फोडणी करून घ्या. मग त्यात आलं-लसूण किस/पेस्ट टाकून परतून घ्या. मग त्यात टोमॅटो प्युरी घाला. परतून घ्या ३. मग त्यात सारं जितकं दाट-पातळ हवं आहे तितकं पाणी घाला. मी ४-५ कप पाणी घातले आहे. चवीनुसार तिखट, मीठ, साखर घाला. साखर नेहमीपेक्षा थोडी जास्त घाला. आता त्यात खोबरं-कोथिंबीर घालून उकळी आणा. ४. आणि असं मस्त गरम गरम सार वाफाळत्या भाताबरोबर फस्त करा.