एकूण पृष्ठसंख्या: ६४ किंमतः ६० रू. फक्त. नवता प्रकाशन मिपावर येण्यापूर्वी मराठीत काही लिहायचं तर मला फक्त iLeap हे एकच सॉफ्टवेअर माहित होतं. पण त्यात सगळी अक्षरं ऑनस्क्रीन कीबोर्डावर लिहायची असल्यानं टंकाळा यायचा. मराठी आंतरजालाशी ओळख झाली तरी मी वाचनमात्रच होते. एकदा कधीतरी एक चार ओळींचा प्रतिसाद लिहिला, त्यानेही चांगली पंधरा-वीस मिनिटे खाल्ली. मद्रासच्या सफरीचा पहिला भाग लिहिताना जी दमछाक झाली ती तर अजूनही लक्षात आहे. अशा वेळेस दणादण लेख, प्रतिसाद आणि मेगाबायटी खरडी टाकणार्‍यांसमोर कित्येकदा लोटंगण घालायची इच्छा व्हायची. (तेव्हा व्हायची, आता नाहीय. नाहीतर ढीगभर पायांचे फोटो यायचे व्यनि-खरडींमधून.) आजकाल मला इतक्या सहजपणे मराठी लिहिताना पाहून इतरांच्या चेहर्‍यावरचा आदरभाव दिसतो. त्यांनाही मी "हे खूप सोपं आहे, तुम्हालाही सहज जमेल" असं सांगते. उदाहरण दाखवलं, की त्यांनाही पटतं, पण स्वत:ला जमेल की नाही याचा अंदाज येत नाही. अशांसाठी सन्माननीय* श्री. प्रसाद ताम्हनकर यांचे 'संगणकावर मराठीत कसे लिहाल?' हे सहज-सोपं-छोटेखानी पुस्तक उपयोगी पडेल. आपण सगळेच मराठीत लिहितो. त्यामुळे पुस्तकात नक्की काय वेगळे असेल ही उत्सुकता सर्वांनाच आहे म्हणून हा लेखनप्रपंच. पुस्तकाची अनुक्रमणिका १. संगणकावर मराठी भाषा कशी वापरावी? २. टंकलेखन तक्ता ३. गमभन ४. गमभन टूलकिट ५. 'गमभन'चे फायरफॉक्स एक्सटेंशन ६. बरहा ७. गूगल transliterate ८. गूगल transliterate online ९. quillpad १०. समारोप अनुक्रमणिकेवरून पुस्तकात काय असेल अशी साधारण कल्पना येते. सर्वात आधी युनिकोड ची तोंडओळख आणि त्यामुळे मराठी लेखन कसे सोपं झालेय याची थोडक्यात माहिती दिली आहे. त्यानंतर पायरीपायरीने सुस्पष्ट स्क्रीनशॉट्स तसेच कमीत कमी आणि समर्पक वाक्यांत गमभन ऑफलाईन कसे इन्स्टॉल करावे, तसेच ते ऑनलाईन कसे वापरावे हे सोदाहरण दाखवलेय. तीच गोष्ट फायरफॉक्स एक्स्टेंशन आणि बरहा, गूगल transliterate आणि क्विलपॅडची. उदाहरणादाखल काही वाक्येही इंग्रजी टाईपात आणि ती मराठीत कशी दिसतील हेही दाखवून दिले आहे. इन्स्क्रिप्ट बहुधा मुद्दामच वगळलं असावं कारण त्याचा कळफलक खास लक्षात ठेवावा लागतो. हा सगळा माहितीचा खजिना अवघ्या सत्तावन्न पानांच्या पुस्तकात अगदी व्यवस्थित बसवला आहे. थोडक्यात सांगायचं तर अतिमाहितीचा मारा नाही, आणि आवश्यक असं काही वगळलं नाही** असा या पुस्तकाचा सारांश म्हणता येईल. *- प्रकशन सोहळ्यात कुणाच्या नावापुढे सन्माननीय हा शब्द लावला नाही तर बहुधा त्या निवेदिकेला मंचावरून हाकलून देण्यात येईल अशी धमकी मिळाली होती. त्यामुळे हा शब्द अजून छळतोय **- बरहामध्ये काही शब्द टंकताना साधारण युनिकोड्/गमभनपेक्षा वेगळे लिहावे लागतात. उदा: क्ष, र्‍य, ज्ञ, अ‍ॅ,ऑ इ.इ. याच ही माहिती देण्यास सन्माननीय लेखक विसरलेले दिसतात. (हा उगाच आमचा छिद्रान्वेषीपणा)