सुकट-मसाला

साहित्यः १ वाटी सुकट (सुकी-करंदी) डोके काढून, पाण्यात १० मिनिटे भिजवून ठेवावी. (खारटपणा कमी होईल) भिजवून ठेवलेली सुकट पाणी निथळून, हाताने दाबून किचन /पेपर टॉवेल वर पसरवावी. २ मोठे कांदे बारीक चिरून. १ टोमॅटो बारीक चिरून किंवा ३-४ आमसुले किंवा १ टेस्पून चिंचेचा कोळ. दीड टेस्पून आले+लसुण+ हिरवी मिरची पेस्ट १ टीस्पून हळद २-३ टीस्पून लाल-तिखट (आपल्या आवडीप्रमाणे कमी-जास्त) १-१/२ टीस्पून धणेपूड १-१/२ टीस्पून गरम-मसाला मीठ चवीप्रमाणे सजावटीसाठी बारीक चिरलेली कोथंबीर तेल पाकृ: प्रथम एका कढईत तेल गरम करून त्यात बारीक चिरलेला कांदा घालणे. मीठ घालून कांद्याला गुलाबी रंग येईपर्यंत परतणे. त्यात आले+लसुण+ हिरवी मिरची पेस्ट घालून त्यांचा कच्चा वास जाईपर्यंत चांगले परतणे. आता त्यात बारीक चिरलेला टोमॅटो घालणे व तो मऊसर शिजेपर्यंत परतणे. त्यात हळद, लाल-तिखट, धणेपूड व गरम-मसाला घालून सर्व एकत्र करावे. त्यात सुकट घालावी आणी सगळं एकत्र करावे. मध्यम आचेवर झाकून शिजवावी. तयार झाली की त्यावर कोथंबीर घालून गरमा-गरम तांदळाच्या किंवा कुठल्याही भाकरीबरोबर खायला सुरुवात करावी :) असेच सुके बोंबील, सुका जवळा घालून बनवता येतं.